Atyraýda 800 myń teńge para alǵan aýyl ákimi 32 mln teńge aıyppul tóleıtin boldy

ATYRAÝ. QazAqparat – Atyraý oblysynda para alǵan aýyl okrýgi ákimine 32 mln teńge aıyppul salyndy, dep habarlaıdy QazAqparat.

Oblystyq sottyń baspasóz qyzmetinen málim etkendeı, Qurmanǵazy aýdanynda aýyldyq okrýg ákimi seriktestik dırektorynan 800 myń teńge para alǵan.

Osy derekke baılanysty qozǵalǵan qylmystyq is qozǵalǵan.

Qurmanǵazy aýdandyq sotynda okrýg ákimine qatysty QR Qylmystyq kodeksiniń 366-babynyń 2-bóligimen para alý, 369-baptyń 1-bóligimen qyzmettik jalǵandyq jasaý deregimen, al, seriktestik dırektoryna QR Qylmystyq kodeksiniń 367-babynyń 2-bóligimen para berý, 385-baptyń 1-bóligimen qujattardy qoldan jasaý deregimen aıyptaý úkimi shyǵaryldy.

«H. aýyldyq okrýg ákimi laýazymyn atqara otyryp, ákim apparatyna tıesili ǵımaratty satýǵa járdemdeskeni jáne sottalýshy K. jalǵan málimetter engizgen resmı qujattardy tirkeýshi organǵa bergeni úshin JShS dırektory K-dan 800 000 teńge somasynda para alǵan. Sottalýshylardyń kinási ózderiniń moıyndaýymen, jedel-izdestirý sharalarynyń jáne jasyryn tergeý áreketiniń nátıjelerimen, beınefonografııalyq saraptamanyń qorytyndysymen, memlekettik aýdıtordyń qorytyndysymen, bank qujattarymen dáleldendi. Sot jaza taǵaıyndaý barysynda H-nyń asyraýynda múgedek balasynyń, al, K-nyń qart ata-anasynyń baryn eskerdi. Eki sottalýshy da óz kinásin tolyq moıyndady», -dep habarlady oblystyq sottyń baspasóz qyzmeti.

Qurmanǵazy aýdandyq sotynyń úkimimen aýyldyq okrýg ákimi H-ǵa 32 mln teńge, seriktestik dırektory K-ǵa 16 mln teńge mólsherinde aıyppul túrindegi jaza taǵaıyndaldy.

Sottalǵandardyń ekeýi de memlekettik qyzmette laýazymdardy atqarý quqyǵynan ómir boıyna aıyryldy.

Sot úkimi zańdy kúshine engen joq.

Eske sala ketelik, buǵan deıin sot úkimimen Atyraý oblysy ákiminiń orynbasary kinásiz dep tanylǵanyn jazǵan bolatynbyz.