Atyraýda 80 mln teńgeni daýlaǵan taraptar medıatsııa tártibimen tatýlasty
ATYRAÝ. QazAqparat – Atyraýda 80 mln teńgeni daýlaǵan taraptar medıatsııa tártibimen tatýlasty, dep habarlaıdy QazAqparat.
Oblystyq sottyń baspasóz qyzmetiniń málimetinshe, eki seriktestik arasynda mindetti quqyqtyq qatynastarǵa baılanysty daý týyndaǵan. Taraptardyń biri jobalaý-izdestirý jumysyn atqarýǵa baılanysty mindetin oryndamaǵan.
«Kelisim-shartta 12 jobalaý-izdestirý jumysy qaralǵan. Alaıda, birinshi taraptyń kórsetýinshe, onyń jeteýi ǵana oryndalǵan. Tapsyrys bergen seriktestik ekinshi tarapqa aldyn ala 100% tólem jasaǵan. Osyǵan baılanysty taraptyń biri ekinshisinen zalaldy, sondaı-aq, turaqsyzdyq aıybyn óndirý týraly talap qoıý aryzyn berdi.
Ekinshi tarap jobalaý-izdestirý jumysyn jasaqtaý boıynsha jumystardy júrgizgeni úshin bereshekti óndirý týraly qarsy talap qoıý aryzyn túsirdi. Eki talaptyń jalpy somasy 80 000 000 teńgeden astam somany qurady» - dep habarlady oblystyq sottyń baspasóz qyzmeti.
Birinshi satydaǵy sot talap qoıý aryzynyń basym bóligin, sondaı-aq, qarsy talapty qanaǵattandyrýdan tolyq bas tartqan.
Atalǵan is Atyraý oblystyq sotynyń azamattyq ister jónindegi sot alqasynda qaralǵan. Tatýlastyrýshy sýdıanyń kómegimen taraptar daýdy medıatsııa tártibimen retteý týraly kelisim jasaǵan. Bul kelisim sotpen bekitilgen. Medıatsııalyq kelisimniń talaptaryna sáıkes eki tarap bir-birine ózara narazylyqtan bas tartqan.
Sot qaýlysy zańdy kúshine endi.
