Atyraýda 8-synyp oqýshysyn urǵan jasóspirimderge qatysty qylmystyq is qozǵaldy
ATYRAÝ. QazAqparat – Atyraýda 8-synyp oqýshysyn urǵan jasóspirimderge qatysty qylmystyq is qozǵaldy, dep habarlaıdy QazAqparat.
Budan buryn áleýmettik jelide Atyraýda kámelet jasyna tolmaǵan 5 jasóspirimniń 8-synyp oqýshysyn urǵan vıdeosy taraǵan edi. Oblystyq bilim basqarmasynyń baspasóz qyzmeti taratqan aqparatqa súıensek, oqıǵa 12 sáýirde saǵat 18:30 shamasynda Atyraý qalasyndaǵy mektep-ınternat ǵımaratynyń artynda bolǵan.
«Atalǵan vıdeoǵa baılanysty polıtsııa qyzmetkerleri tekserý júrgizip, jaǵdaıdy jábirlenýshi taraptyń anasyna habarlaǵan. Qazir osy oqıǵaǵa qatysy bar 5 jasóspirim, onyń ishinde mekteptiń 4 oqýshysy men kolledjdiń 1 stýdenti anyqtaldy. Olarǵa qatysty QR Qylmystyq Kodeksiniń 293-baby, 2-bóliginiń 1-tarmaǵyna sáıkes qylmystyq is qozǵaldy» -dep habarlady basqarmanyń baspasóz qyzmetinen.
Sondaı-aq, jaýapqa tartylǵan jasóspirimder oqıtyn bilim berý mekemeleriniń basshylarynan túsinikteme alynǵan. Al, soqqyǵa jyǵylǵan oqqýshyǵa psıhologtiń kómegi kórsetilgen.
Eske sala ketelik, buǵan deıin Atyraý oblysynda bir otbasynyń eki balasy narkologııalyq esepke alynǵanyn jazǵan bolatynbyz.
