Atyraýda 73 jastaǵy dáriger vaktsına saldyrdy
ATYRAÝ. QazAqparat – Atyraýda 73 jastaǵy dáriger koronavırýsqa qarsy vaktsına saldyrdy, dep habarlaıdy QazAqparat.
Oblys ákiminiń orynbasary Baqytgúl Hamenovanyń málimetinshe, Atyraýǵa vaktsınalaý bastalardan bir kún buryn «Spýtnık-V» vaktsınasynyń 1000 dozasy jetkizilgen. Vaktsına salý úshin Atyraý qalasynda 16, al aýdandarda 8 arnaıy oryn daıyndalǵan.
«Dárigerlermen birge, koronavırýsqa qarsy vaktsınanyń ekinshi komponentin aldym. Vaktsınatsııa azdap aýyrsynýmen qatar júrdi. Biraq birinshi kezeńnen keıin janama áseri bolǵan joq. Vaktsına alý – «Covid-19» qaýipti vırýsyn juqtyrmaýdyń basty joly», - deıdi Baqytgúl Hamenova.
Vaktsına saldyrǵan dárigerlerdiń arasynda 73 jastaǵy hırýrg Marat Esjanov ta bar. Onyń aıtýynsha, vaktsınanyń janama áseri joq.
«Men de 1 aqpanda áriptesterimmen birge koronavırýsqa qarsy vaktsınanyń birinshi kezeńin aldym. Dene qyzýy, álsizdik, bas aınalý sekildi áserler, basqa da asqynýlar bolǵan joq. Vaktsınatsııadan keıin 10-15 mınýt dárigerler baqylaýynda boldyq. Keıin kúndelikti jumysymyzǵa kiristik», - deıdi Marat Esjanov.
Eske sala ketelik, Atyraý oblysynda vaktsınatsııalaýdyń birinshi kezeńi aıaqtalǵanyn habarlaǵan edik.
