Atyraýda 72 tutynýshynyń eki mln teńgeden astam aqshasy qaıtarylǵan

ATYRAÝ. QazAqparat – Atyraý oblysynda 72 tutynýshynyń aryzyna sáıkes 2 210 343 teńgesi qaıtarylǵan, dep habarlaıdy QazAqparat.

Oblystyq tutynýshylar quqyǵyn qorǵaý departamentiniń basshysy Álem Ýálıevtyń málimetine súıensek, atyraýlyq tutynýshylardan 237 aryz túsken.

Onyń ishinde 137 aryzdanýshyǵa túsindirý jumysy júrgizilgen.

«Tutynýshylardyń 72 aryzyna jaýap berilip, 2 210 343 teńgesi qaıtarylyp berildi. Al, 23 aryzda qozǵalǵan másele departamenttiń qyzmetine qatysty bolmaǵandyqtan, tıisti organdarǵa joldandy», -deıdi Álem Ýálıev.

Onyń aıtýynsha, jyl basynan beri 117 tutynýshy tikeleı jáne baılanys telefony arqyly konsýltatıvtik keńes alǵan.

Sondaı-aq, e-tutynushy.kz servıstik platformasyna túsken 12 aryzdyń 7-eýiniń ıesine túsindirý jumysy júrgizilgen.

Al, 5 aryz ıesiniń talaby qanaǵattandyrylǵan.

Eske sala ketelik, Atyraýda jyl basynan beri 19 tutynýshyǵa 1 mln-nan astam teńgesi qaıtarylǵanyn habarlaǵan edik.