Atyraýda 70 medıtsına qyzmetkerine «Halyq alǵysy» medali tapsyryldy
ATYRAÝ. QazAqparat – Atyraýda koronavırýs ınfektsııasymen kúreste jumys istegen medıtsına salasynyń 70 qyzmetkerine «Halyq alǵysy» medali tabystaldy, dep habarlaıdy QazAqparat.
Oblys ákiminiń orynbasary Baqytgúl Hamenova medıtsına qyzmetkerleriniń eńbegin erekshe atap ótti.
«Bul indet tutas álem, Qazaqstan úshin de úlken synaq boldy. Sol synaqta medıtsına salasynyń, Qarýly Kúshter, polıtsııa qyzmetkerleriniń, eriktilerdiń erlikke bergisiz kúndelikti isine el kýá. Dárigerlerimiz syrqattardy emdeýmen shektelip qana qoımaı, vırýstyń keń taramaýy úshin aıanbaı eńbek etti» -dedi oblys ákiminiń orynbasary Baqytgúl Hamenova.
Onyń aıtýynsha, óńirde 7 995 medıtsına qyzmetkeri jumys isteıdi. Sonyń ishinen koronavırýs ınfektsııasymen kúreske 2480 qyzmetker jumyldyryldy.
«Halyq alǵysy» medali qaýipti indettiń birinshi tolqynynda aldyńǵy shepte jumys istep, qaýipti ınfektsııadan kóz jumǵan medıtsına qyzmetkerlerine berilgen. Ýaqytpen sanaspaı, ár naýqastyń ómiri úshin kúresken joǵary bilimdi dárigerdiń biri – Narıman Aqpanov. Eldegi epıdemıologııalyq ahýal ýshyqqan tusta Narıman Aqpanov vırýs juqtyrǵandardy rentgenge túsirgen. Alaıda ózi koronavırýs juqtyryp, qaıtys boldy. «Halyq alǵysy» medali marqumnyń áıeli Darıǵa Múslimovaǵa tabystaldy.
Al Zemfıra Erbolatqyzy – №2 oblystyq aýrýhanada jumys isteıtin orta býyn qyzmetkeri. Ol da úsh aı boıy otbasyna barmaı, indet oshaǵynda boldy. Sóıtip, ózi tańdaǵan mamandyǵyna adaldyǵyn tanytyp, halyqtyń densaýlyǵyn saqtaý jolyndaǵy mindetin minsiz atqardy. Qaýipti ınfektsııa saldarynan qos ókpesi qysylyp, dem jetpegenderge ottegi apparatyn qosyp, myńdaǵan azamattyń ómirin arashalap qalǵanyn maqtan tutady.
Eske sala ketelik, budan buryn Atyraý birqatar azamat pen jýrnalıster «Halyq alǵysy» medalimen marapattalǵanyn habarlaǵan bolatynbyz.
