Atyraýda 7 jyl qujatsyz júrgen sheteldik ustaldy
Oblystyq Polıtsııa departamentiniń baspasóz qyzmetinen málim etkendeı, ýchaskelik polıtsııa qyzmetkerleri 1 qazannan beri «Ýchaske» jedel profılaktıkalyq is-sharasyn ótkizip jatyr.
«Іs-shara kezinde tártip saqshylary 2015 jyldan beri qujatsyz júrgen Ózbekstan Respýblıkasynyń azamatyn anyqtady. Atalǵan derek boıynsha 53 jastaǵy shetel azamaty Atyraý qalalyq polıtsııa basqarmasynyń qabyldaý-taratý ortalyǵyna ornalastyryldy. Qazirgi ýaqytta shetel azamatyna qatysty kóshi-qon polıtsııasy tıisti is-qujattar jınaqtap, zańdy sheshim qabyldaý úshin sotqa joldaıdy», - dep habarlady departamenttiń baspasóz qyzmetinen.
Budan buryn Atyraý qalalyq polıtsııa basqarmasy men Inder aýdandyq polıtsııa bóliminiń qyzmetkerleri Ózbekstan Respýblıkasynan kelgen 37 adamnyń ruqsat qujaty bolmaǵanyn jáne olar zańsyz jumys istep júrgenin anyqtaǵan bolatyn. Sot sheshimimen 14 azamat el aýmaǵynan shyǵaryldy.
Sondaı-aq óz erkimen el aýmaǵynan shyǵý týraly sot sheshimin oryndamaı júrgen ózbekstandyq 9 azamat anyqtaldy. Sheteldikter 19 qyrkúıekte «Tájen» baqylaý beketi arqyly el aýmaǵynan májbúrlep shyǵarylǵan.
Eske salaıyq, Atyraý oblysynda sheteldik 232 mamannyń jumys isteýine ruqsat berilmegenin jazǵan bolatynbyz.