Atyraýda 7-synyp oqýshysy ıterip jibergen muǵalim jaraqat aldy

ATYRAÝ. QazAqparat – Atyraýda 7-synyp oqýshysy muǵalimdi ıterip, edenge qulatqan. Qazir muǵalim emdelip jatyr, dep habarlaıdy QazAqparat tilshisi.

Oqıǵa 11 qazanda Atyraý qalasyndaǵy 24-orta mektepte bolǵan.

«Tarıh pániniń muǵalimi 7-synyp oqýshylaryna bólim boıynsha jıyntyq baǵalaý tapsyrmasyn bergen. Muǵalim oqýshyǵa tapsyrmany ne sebepti jazbaı otyrǵanyn bilýge jáne oryndaýǵa kómektesý úshin jaqyndaǵan. Sol kezde oqýshy muǵalimdi dóreki túrde ıterip jibergen. Sonyń nátıjesinde muǵalim edenge qulaǵan. Oqýshynyń óreskel áreketine baılanysty ata-anasy shaqyrylyp, habardar etildi. Oqýshynyń ata-anasy muǵalimnen keshirim surady» -deıdi mektep dırektory H.Lı
Qazir tarıh pániniń muǵalimi eńbekke jaramsyz paraǵyn ashtyryp, em qabyldap jatyr. Muǵalim oń qolynan jaraqat alǵan.
«Oqýshy mektepishilik esepke alyndy. Jasóspirimder isi jónindegi komıssııaǵa joldaý úshin oqýshyǵa qatysty qujattar daıyndalyp jatyr» -dep málim etti H.Lı.
Oblystyq polıtsııa departamentiniń baspasóz qyzmetinen málim etkendeı, jaraqat alǵan muǵalimnen shaǵym túspegen.
Eske sala ketelik, budan buryn Atyraýda 14 jasar oqýshy mektepke bomba qoıyldy dep jalǵan habar bergenin habarlaǵan bolatynbyz.