Atyraýda 7 adamnan turatyn qylmystyq toptyń bes márte mal urlaǵany dáleldendi

ATYRAÝ. QazAqparat – Atyraý oblysynda 7 adamnyń bes ret mal urlyǵyna qatysqany dáleldengen, dep habarlaıdy QazAqparat.

Oblystyq polıtsııa departamenti baspasóz qyzmetiniń málimetinshe, «Mal urysy» jedel aldyn alý sharasy ótip jatyr.

«Іs-shara kezinde mal jáne et ónimderin tasymaldaıtyn avtokólikter men et ónimderin satatyn bazarlardy tekserý úshin 10 top quryldy. Top quramyndaǵy polıtseıler mal jáne et ónimderin tasymaldaıtyn 154 avtokólik, mal jáne et ónimderin satatyn 75 oryn men 229 sharýa qojalyǵyn tekserdi. Sonyń nátıjesinde mal men et ónimderin qujatsyz tasymaldaýǵa qatysty 16 derek anyqtaldy. Al, 12 adamǵa qatysty Ákimshilik quqyq buzý týraly kodekstiń 406-baby, 1-bóliginiń 2-tarmaqshasyna sáıkes 459 450 teńgeniń ákimshilik aıyppuly salyndy. Shalǵaıdaǵy ýchaskelerdi, qystaqtar men sharýa qojalyqtaryn tekserý kezinde tirkelmegen «IJ-K» markaly 16 kalıbrli ańshy myltyǵy tárkilenip, saraptamaǵa joldandy», -deıdi krımınaldyq polıtsııa basqarmasynyń bólim bastyǵy polıtsııa podpolkovnıgi Abaı Jumabaev.

Onyń aıtýynsha, jedel aldyn alý is-sharasy kezinde mal urlyǵymen aınalysqan 7 adam anyqtalǵan.

«Kúdiktilerdiń bes mal urlyǵy qylmysyna qatysqany dáleldendi. Onyń ishinde 2-eýi - ótken jyly, 3-eýi - buryn jasalǵan qylmystar. Sondaı-aq urlanǵan 19 mal ıelerine qaıtaryldy. Máselen, Qurmanǵazy aýdanynda mal urlaǵan 2 ury ustaldy. Kúdiktiler jaıylymnan eki jylqy jasyryn jymqyrǵan. Sodan keıin jylqylardy satyp, aqshany óz qajetine jumsaǵan. Qazir kúdiktilerge qatysty QR Qylmystyq kodekstiń 188-babynyń 2-bóligimen is-qujattar jınaqtalyp jatyr», -dep málim etti Abaı Jumabaev.

Eske sala ketelik, buǵan deıin Atyraýda 30 jastaǵy jigitten jarty kelige jýyq sıntetıkalyq esirtki tárkilengenin jazǵan bolatynbyz.