Atyraýda 7 adam koronavırýstan jazylyp shyqty
ATYRAÝ. QazAqparat – Búgin Atyraý oblysynda 7 adam koronavırýs ınfektsııasynan jazylyp shyqty. Sóıtip, qaýipti indetten aıyqqandar 12-ge jetti, dep habarlaıdy QazAqparat.
Tótenshe jaǵdaı rejımin qamtamasyz etý jónindegi óńirlik jedel shtabtyń málimetinshe, búgin, 14 sáýirde tústen keıin 7 adam qaýipti indetten jazylyp, ınfektsııalyq statsıonardan shyqqan. Densaýlyq saqtaý basqarmasynyń deregine súıensek, olardyń bári ózderin jaqsy sezinedi. Osylaısha, Atyraýda Covid-19 indetinen aıyqqandardyń sany 12-ge jetti.
Qazir Atyraýdaǵy ınfektsııalyq statsıonarda 51 naýqas jatyr. Buǵan deıin 12 sáýirde 2 adam, al, keshe, 13 sáýirde 3 adam qaýipti indetten jazylyp shyqqan edi.
