Atyraýda 67 mln teńgeniń zańsyz temeki ónimderi anyqtaldy
Atyraý oblysy boıynsha memlekettik kirister departamenti baspasóz qyzmetiniń málimetine súıensek, zańsyz ónim reıdtik is-shara kezinde anyqtalǵan.
«Kásiporyn qyzmetin memlekettik kirister organdarynda temeki ónimderin kóterme satýshy retinde tirkeýsiz júzege asyryp kelgen. Odan 96 myń 69 qorapqa salynǵan zańsyz temeki ónimi anyqtaldy. Zańsyz ónimniń jalpy quny - 67 mln 178 myń 454 teńge», - dep habarlady departamenttiń baspasóz qyzmeti.
Qazir salyqtyq tekserý aktisi jasaldy. Tekserý qorytyndysymen jınaqtalǵan is materıaldary protsestik sheshim qabyldaý úshin sotqa beriletin bolady.
Eske sala ketelik, buǵan deıin Atyraýda zańsyz aınalymnan 6,7 mln teńgeniń temeki ónimderi alynǵanyn habarlaǵan bolatynbyz.
Oblystyq memlekettik kirister jáne ekonomıkalyq tergeý departamentteriniń qyzmetkerleri Atyraý qalasyndaǵy qoımalar men dúkenniń birine tekserý júrgizgen.
«Birlesken tekserý kezinde zańsyz saqtalǵan elektrondy temeki, veıp-qurylǵylar men olarǵa suıyqtyq túrindegi 2,5 myńnan astam zańsyz temeki ónimi anyqtaldy. Zańsyz aınalymnan alynǵan temeki ónimderiniń naryqtyq quny shamamen 6,7 mln teńge bolady. Mundaı ónimder sáıkestendirý quraldarymen tańbalanatyn aktsızdeletin ónimder sanatyna jatady. Sol sebepten, temeki ónimderiniń zańsyz aınalymynyń joly kesildi», - dep málim etken edi departamenttiń baspasóz qyzmetinen.
