Atyraýda 63 jastaǵy áıel 11 jyldan keıin shartty túrde bostandyqqa shyqty
Atyraý oblysy boıynsha Qylmystyq-atqarý júıesi departamenti baspasóz qyzmetinen málim etkendeı, Rabıǵa esimdi áıel Taraz qalasynda esirtki satýmen aınalysqan. Ony polıtsııa qyzmetkerleri geroın satý kezinde ustaǵan. Al, sot úkimimen 15 jylǵa sottalyp, múlki tárkilengen. Sottalǵannan keıin jazasyn Qazaqstannyń ózge túrmelerinde ótep, keıin Atyraýdaǵy ÝG-157/11 mekemesine aýystyrylǵan.
«Alaıda, QR Qylmystyq-protsessýaldyq Kodeksine sáıkes jazasyn óteýshi 2021 jyldyń naýryz aıynda merziminen buryn shartty túrde bostandyqqa shyqty. Oǵan qajetti quqyqtyq-áleýmettik kómek kórsetilip, kútip alýǵa týystary shaqyryldy. Jazasyn óteý kezinde tártipti bolyp, quqyq buzýshylyqtarmen kózge túsken joq. Ol týraly málimet Jambyl oblysy boıynsha QAJD jiberildi» -deıdi ÝG-157/11 mekemesi bastyǵynyń orynbasary Medet Adjıkýlov.
Shartty túrde bostandyqqa shyqqan Rabıǵanyń aıtýynsha, Tarazdaǵy úıine oralyp, týystarymen kezdesýdi kózdep otyr. Sodan keıin túrmede bolǵan kezde ómirden ótken týystarynyń rýhyna quran baǵyshtamaq.
«Túrmede ótken 11 jylda kóp nárseni joǵalttym. Jasaǵan qylmysyma ókinýmen boldym. Qartaıǵan kezimde nemere-shóberemdi oınatýdyń ornyna, qylmys jasadym. Mekeme qyzmetkerleri meni tárbıelep, durys jolǵa saldy. Qalǵan ómirimdi tynysh ótkizgim keledi»,-deıdi bostandyqqa shyqqan Rabıǵa.
Rabıǵa jasy ulǵaıǵandyqtan jumys istemeıdi. Alaıda oǵan qajetti kómekter kórsetiletin bolady.
Eske sala ketelik, budan buryn Atyraý túrmelerinde sottalǵandarǵa týystarymen kezdesýge ruqsat berilgen bolatyn.
