Atyraýda 600 oryndyq jańa mekteptiń qurylysy aıaqtaldy

ATYRAÝ. QazAqparat – Atyraý qalasyndaǵy «Balaýsa» shaǵynaýdanynda 600 orynǵa eseptelgen jańa orta mekteptiń qurylysy aıaqtaldy, dep habarlaıdy QazAqparat.

Oblystyq qurylys basqarmasynyń basshysy Nurbergen Qusaıynovtyń aıtýynsha, úsh qabatty mekteptiń qurylysy 2019 jyly bastalǵan bolatyn. 3 gektar ýchaskege jalpy aýdany 8478 sharshy metrdi quraıtyn ǵımarat boı kóterdi.

«Qazir nysandy teńgerim ustaýshyǵa berý úshin qujattary daıyndalyp jatyr. Mektep zamanaýı úlgige saı salynǵan. Munda oqý kabınetteri ınteraktıvti taqtamen, zerthana bólmesimen jabdyqtalǵan. Mektep ashana, sport alańy, júgirý joly, tennıs, fýtbol, basketbol alańdary, balalar oınaıtyn labırınt, syrǵanaq qural-jabdyqtarymen qamtylǵan», - deıdi Nurbergen Qusaıynov.

Atyraý qalalyq bilim bóliminiń basshysy Farýza Shangereevanyń aıtýyna qaraǵanda, jańa mektep úsh aýysymdy oqytý máselesin sheshýge oń yqpal etedi.

«Jańa mektepte oqıtyn oqýshylar deregi 1-11 synyptar boıynsha aldyn ala jınaqtaldy. Sol málimetke sáıkes «Balaýsa» shaǵynaýdanynda turatyn 616 oqýshy jańa mektepke aýysady. Ashylǵaly otyrǵan №43 orta mektepke baratyn oqýshylardyń kópshiligi buǵan deıin M.Ótemisov atyndaǵy bilim ordasynda oqydy. Mektepte úsh aýysymǵa kóshý qaýpi bolǵan. Jańa mektep paıdalanýǵa berilgen soń osy máseleni oń sheshýge múmkindik týady», - dedi Farýza Shangereeva.

Onyń aıtýynsha, jańa mektepti jyl sońyna deıin paıdalanýǵa berý josparlanyp otyr.

Eske salaıyq, budan buryn Atyraýda 900 oqýshyǵa arnalǵan ózgeshe mekteptiń qurylysy bastalǵanyn jazǵan edik.