Atyraýda 6 jasar qyz 5-qabattan qulap, aýrýhananyń jansaqtaý bólimine tústi
Atyraý oblystyq tótenshe jaǵdaılar departamentiniń qoǵammen baılanys tobynyń málimetinshe, oqıǵa Atyraý qalasynda bolǵan.
«Keshe, 13 tamyzda jergilikti ýaqytpen saǵat 22:00 shamasynda 6 jasar qyzdyń Atyraý qalasynyń Vokzal mańy-3a shaǵynaýdanyndaǵy turǵyn úıdiń 5-qabatynan qulaǵany týraly habar tústi. Tótenshe jaǵdaılar departamentiniń 4 qyzmetkeri oqıǵa ornyna jedel jetip, 6 jasar qyzdyń úıde qaraýsyz qalǵanyn anyqtady. Zardap shekken jasóspirimniń jaǵdaıy aýyr. Qazir oblystyq balalar aýrýhanasynyń jansaqtaý bóliminde jatyr», -dep habarlady departamenttiń qoǵammen baılanys tobynan.
Tótenshelikter ótken aptada 65 ret shaqyrtýǵa barǵan. Onyń ishinde 8 órt deregi bar. Janý týraly 32 shaqyrtý túsken. Avarııalyq qutqarýǵa baılanysty 4, izdestirý jumystaryna qatysty 8 derek tirkelgen.
Eske sala ketelik, buǵan deıin Atyraý oblysynda jyl basynan beri terezeden 5 bala qulap, ekeýi mert bolǵanyn habarlaǵan edik.
Bıylǵy jyl basynan beri oblysta osyndaı 5 derek tirkelgen. Onyń ishinde 2 bala kóz jumdy.
Oblystyq departamentke qarasty tótenshe jaǵdaılardardyń aldyn alý bóliminiń bas mamany, azamattyq qorǵaý kapıtany Erbol Ǵabıtovtyń aıtýynsha, balanyń qaýipsizdigi úshin birneshe keńeske nazar aýdarý kerek.
«Balalardyń óz betimen balkonǵa shyǵýyna ruqsat bermegen durys. Tereze jaqtaýynyń tusyna jıhaz qoıýǵa bolmaıdy. Eń qaýiptisi – moskıtty tor. Bala oǵan súıengen kezde tormen birge qulap ketýi múmkin. Eń bastysy, balany úıde jalǵyz qaldyrmaý qajet», -deıdi Erbol Ǵabıtov.
