Atyraýda 6 aıda esirtkini zańsyz satý, taratý qylmysymen 30 adam sottaldy
Atyraý oblystyq prokýratýrasy baspasóz qyzmetiniń aqparatyna súıensek, sottalǵandardyń arasynda 18 jastaǵy boıjetken men 20 jastaǵy jas jigit bar.
«Esirtki men psıhotroptyq zattardy asa iri mólsherde taratý – 10 jyldan ómir boıyna bas bostandyǵynan aıyrý túrindegi qylmystyq jaýapkershilikke ákelip soqtyratyn asa aýyr qylmys. Al sıntetıkalyq zattardyń salmaǵy 1 gramnan assa, iri mólsher bolyp sanalady. Atyraý oblysynda bıylǵy 6 aıda esirtki jáne psıhotroptyq zattardyń zańsyz aınalymyna baılanysty qylmys jasaǵany úshin 30 adam sottaldy. Onyń ishinde 21 adam esirtkini zańsyz taratyp kelgen. Máselen, sot úkimimen 18 jastaǵy jas qyz sıntetıkalyq esirtkini taratqany úshin 7 jylǵa bas bostandyǵynan aıyryldy. Ony mundaı qylmystyq áreketke 20 jastaǵy jigiti tartqan. Sol sebepten jas jigitke 10 jylǵa bas bostandyǵynan aıyrý jazasy taǵaıyndaldy», – dep habarlady oblystyq prokýratýranyń baspasóz qyzmeti.
Belgili bolǵandaı, ásirese, jastardyń mundaı qylmystardy jeńil jolmen mol aqsha tabý úshin jasaıtyny anyqtalǵan.
«Biraq jastar esirtki satýmen aınalysqan kezdegi is-áreketiniń aýyrlyǵyn, bul qylmystyń qandaı saldary bolýy múmkin ekenin eskermeıdi. Sondyqtan azamattarǵa muqııat bolý, jeńil paıdaǵa berilmeý jáne kúdikti áreketter týraly quqyq qorǵaý organdaryna habarlaý qajettigin eskertemiz», – dep málim etti prokýratýranyń baspasóz qyzmetinen.
Eske sala ketelik, buǵan deıin Atyraýǵa ózge óńirden kelip, esirtki satqan eki adam 7 jáne 10 jylǵa sottalǵanyn jazǵan edik.
