Atyraýda 53 jastaǵy shetel azamaty dırektor bolyp zańsyz jumys istegen

ATYRAÝ. QazAqparat - Atyraýda jyl basynan beri 26 shetel azamaty el aýmaǵynan tysqary shyǵaryldy, dep habarlaıdy QazAqparat tilshisi.

Taıaýda sot tóreligimen QHR azamatyn el aýmaǵynan shyǵarý jóninde sheshim qabyldandy. 53 jastaǵy shetel azamaty oblys aýmaǵyna iskerlik vızamen (ol vızamen jumys jasaýǵa ruqsat etilmeıdi) kelip, qaladaǵy kompanııalardyń birinde qarjy dırektory bolyp eńbek etken.

«Kóshi-qon polıtsııasy júrgizgen jedel aldyn alý sharalary nátıjesinde QR zańnamasyn óreskel buzǵany úshin 26 shetel azamaty elden shyǵarylǵan. Olardyń 22-si - Ózbekstan azamaty bolsa, 4-eýi - Qytaı azamaty»,- dep habarlady polıtsııa departamentiniń baspasóz qyzmeti.

Aıta ketelik, 2019 jyly kóshi-qon salasy boıynsha 594 ákimshilik zańbuzýshylyq anyqtalǵan.