Atyraýda 42 shaqyrymǵa júgirýden marafon ótedi
ATYRAÝ. QazAqparat - 13 mamyr kúni Atyraýda «Atyrau Marathone - 2018» keń kólemdegi sporttyq sharasy ótedi, dep xabarlaıdy QazAqparat tilshisi.
Beısenbi, 10 mamyrda marafon qatysýshylary sońǵy ujymdyq jattyǵýlaryn ótkizdi. 70 adamnan turatyn top «Atyrau Marathone - 2018» sporttyq sharasyna 20-shy naýryzdan bastap daıyndalýda. Aptasyna 3 ret júgirýshiler basshylarynyń nusqaýymen ártúrli qashyqtyqta qala kóshelerin júgirip ótken. Jarysqa 3 kún qalǵanda júgirýshiler sońǵy jattyǵýlaryn aıaqtady, endi olar jeńiske psıxologııalyq turǵyda daıyndalady.
«Atyrau Marathone - 2018» qatysýshylarynyń jattyqtyrýshysy Altaı Quspanovtyń aıtýynsha, marafonǵa qatysýshylar jarysqa deıin arnaıy jattyǵýdan ótýleri qajet.
«Qatysýshy ózi júgiretin qashyqtyqty tańdap, ózin jarysqa fızıkalyq turǵydan daıyndaý kerek, sonymen qatar, qajetti quraldardy tańdaıdy. Ózimen birge sý ala kelip, 42 shaqyrymǵa júgiretin bolsa júrek jalǵaıtyn asty da ala shyqqany jón, sebebi júgirý 3 saǵatqa sozylady»,- deıdi Altaı Quspanov.
Aıta keteıik, 13 mamyrda 10.000 metr qashyqtyqta júgirý Abylaıxan dańǵylynan bastalady. Qatysýshylar saǵat 8.00-de jınalady, júgirý saǵat 9.15-te bastalady. Yńǵaıly bolý úshin jarysqa qatysýshylardy Maxambet alańynan 8.00-den bastap avtobýstar tasymaldaıdy.
Muz saraıynyń aldyndaǵy alańda 42,195 metr qashyqtyqqa júgirý bastalady. Qatysýshylar saǵat 6.00-de jınalyp, jarys 7.00-de bastalady. Yńǵaıly bolý úshin qatysýshylar avtobýstarmen saǵat 6.00-den bastap Mahambet alańynan jetkiziledi.
4500 metr qashyqtyqta júgirýdi Mahambet alańyna qarama-qarsy Sátpaev kóshesinen bastaý josparlanýda. Qatysýshylar 7.30-da jınalyp, báseke saǵat 9.00-de bastalady.
Aıta ketken jón, 10 mamyrdaǵy aqparat boıynsha onlaın jáne oflaın tirkeýden 3000-ǵa jýyq qatysýshy ótken.
