Atyraýda 42 myń adam jumys berýshiler esebinen tumaýǵa qarsy ekpe jasatty
ATYRAÝ. QazAqparat – Atyraýda 42 myń adam jumys berýshiler esebinen ekpe jasatty, dep habarlaıdy QazAqparat.
«Kún sýytqan saıyn tumaý nemese JRVI juqtyryp alý qaýpi de joǵarylaıdy, ýaqytynda emdelmese aýrý asqynyp ketýi múmkin. Bizde aýyryp qalý qaýpi joǵary top bar, olarǵa – medıtsına qyzmetkerleri, balalar men qarııalar, múgedekter men aıaǵy aýyr áıelder jatady. Olarǵa erekshe kóńil bólemiz, tegin ekpe jasaımyz. 2019 jyly bul toptaǵylarǵa jergilikti bıýdjet 30 myń ekpe aldyrǵan. Topqa kirmeıtinder aqyly negizde ekpe ala alady. Qazirgi ýaqytta tumaýǵa qarsy 984 adam aqyly negizde jáne 42 047 adam jumys berýshilerdiń esebinen ekpe saldyrǵan», - dep málimdedi Atyraý oblysy Taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysynyń mindetin atqarýshy Amantaı Jumaǵalıev.
Esterińizge sala keteıik, Atyraý oblysynda 20-29 jas aralyǵyndaǵy turǵyndarǵa qyzylsha men qyzamyqqa qarsy qosymsha ekpe jasalyp jatyr. Búgingi kúnge deıin 47 250 adam saldyryp úlgergen. Qyzylsha men qyzamyqqa qarsy ekpe jasaý jyl sońyna deıin jalǵasady.
A.Sokolov
