Atyraýda 4 jasar balany kólik qaǵyp ketti
Atyraý oblystyq polıtsııa departamentiniń baspasóz qyzmetinen habarlaǵandaı, jol-kólik oqıǵasy búgin, 20 qazanda bolǵan. Bul týraly 103 pýltine jergilikti ýaqytpen saǵat 18:00 shamasynda habar túsken.
«Búgin Atyraý qalasynyń S.Shóreev kóshesindegi №81 úıdiń tusynda kólik 4 jasar balany qaǵyp ketti. Jol-kólik oqıǵasyna qatysy bar Hyundai Santa Fe markaly avtokóliginiń júrgizýshisi anyqtaldy. Oqıǵa ornyna shaqyrtylǵan jedel medıtsınalyq járdem brıgadasynyń kóligimen zardap shekken balaqaı oblystyq balalar aýrýhanasyna jetkizildi», dep habarlady departamenttiń baspasóz qyzmeti.
Qazir zardap shekken 2018 jyly týǵan bala aýrýhananyń travmatologııa bóliminde jatyr. Dárigerlerdiń aıtýynsha, balanyń mıy shaıqalǵan. Denesinde jaraqaty bar.
Al, polıtsııa qyzmetkerleri jol-kólik oqıǵasyn jasaǵan kólik júrgizýshisine qatysty tıisti is qujattaryn jınaqtap jatyr.
Eske sala ketelik, budan buryn Atyraý oblysynda kólik qaqqan 11 jasar jasóspirim kóz jumǵanyn habarlaǵan bolatynbyz. Jasóspirimdi 73 jastaǵy júrgizýshi Toyota Prado kóligimen qaǵyp ketken.
Keıin Atyraýda jeńil kólik avtobýspen soǵylyp, júrgizýshi kóz jumdy. Skoda markaly avtokólikti basqarǵan 1966 jylǵy júrgizýshisi qoǵamdyq kólikke jol bermegen. Sonyń saldarynan avtobýspen soqtyǵysqan jeńil kóliktiń júrgizýshisi oqıǵa ornynda mert boldy.