Atyraýda 4 turǵyn úı qurylys kooperatıvine tergeý júrip jatyr

ATYRAÝ. QazAqparat – Atyraýda 4 turǵyn úı qurylys kooperatıvine qatysty tergeý júrip jatyr. Bul týraly oblystyq polıtsııa departamentiniń bastyǵy, polıtsııa polkovnıgi Nurhar Orazbaev turǵyndarmen kezdesýde málim etti, dep habarlaıdy QazAqparat tilshisi.

«Qazir alaıaqtyq qylmysynyń órshigeni baıqalady. Osyǵan oraı, turǵyndarǵa jeke qujattary men málimetterine, qarajatyna muqııat bolý qajettiligin únemi eskertip kelemiz. Alaıda, turǵyndar alaıaqtarǵa áli aldanyp jatyr. Áleýmettik jelide nesıe resimdeýge kómek kórsetý usynysy arqyly 80-ge jýyq adamdy aldap, jalpy quny 80 mln teńge zalal keltirgen. Qaraǵandy qalasynyń turǵyny anyqtalyp, ustaldy. Oǵan qatysty qylmystyq is sotqa joldandy», - dep habarlady Nurhat Orazbaev.

Onyń aıtýynsha, úlestik qurylysqa qarajat salý nátıjesinde zardap shekken jábirlenýshiler qatary ósken.

«Departamenttiń tergeý basqarmasynyń qyzmetkerleri «Baısanat», «Qazanat», «Family town» jáne «Saraıshyq» turǵyn úı qurylys kooperatıvterine qatysty tirkelgen isti tergep jatyr. Buǵan 1 mlrd teńgeden astam qarajat salǵan 161 jábirlenýshiniń aryzy sebep boldy», - dep málim etti Nurhat Orazbaev.

Eske sala ketelik, budan buryn oqý ortalyǵyna aldanǵan atyraýlyqtar oblys ákimine shaǵymdanǵanyn habarlaǵan bolatynbyz. Atyraý oblysynyń ákimi Serik Shápkenovtiń qabyldaýyna 13 ata-ana shaǵym aıta keldi. Olar «MegaMozg» oqý ortalyǵyna balalaryna qosymsha bilim berý úshin bir jyldyń aqshasyn tólegen.

«Barlyq jábirlenýshiniń aryzy qabyldandy. Tergeý amaldary aıaqtaldy. Ortalyqqa 145 adam aldanǵan. Kúdikti qamaýǵa alyndy. Bul iske qatysty qoljazba jáne fonoskopııalyq saraptama taǵaıyndaldy. Saraptama qorytyndysy alynǵan soń, is sotqa joldanady. Kúdikti tórt áıelge qatysty sheshim qabyldanady», - dep málim etken edi Atyraý qalasynyń prokýrory Rýslan Aıtımov.