Atyraýda 4 sanıtarlyq bekette baqylaý kúsheıdi
ATYRAÝ. QazAqparat –Atyraý qalasynyń kireberisinde ashylǵan 4 sanıtarlyq bekette baqylaý kúsheıtildi, dep habarlaıdy QazAqparat.
Sanıtarlyq beketter jańadan salynǵan polıtsııa bólimsheleriniń ǵımarattaryna ornalasqan. Atyraý oblysynyń ákimi Mahambet Dosmuhambetov densaýlyq saqtaý basqarmasy, polıtsııa jáne taýarlar men kórsetiletin qyzmetterdiń sapasy men qaýipsizdigin baqylaý departamentteriniń basshylyǵymen kóshpeli keńes ótkizdi. Sanıtarlyq beketterde ózge óńirlerden oblys ortalyǵyna kólikpen ótetin adamdar tekserilip jatyr.
«Kesheden beri sanıtarlyq beketterde polıtsııa qyzmetkerlerimen birge Atyraý oblysy boıynsha taýarlar men qyzmetterdiń sapasy men qaýipsizdigin baqylaý departamentiniń mamandary kezekshilikti bastady. Olar kólik jolaýshylaryn rezıdent emes nómirimen tekseredi. Sonymen qatar, jolaýshylardyń dene qyzýy ólshenedi» dedi departament basshysy Meıirjan Esimbaev.
Oblys ákimi Mahambet Dosmuhambetov bolashaq sanıtarlyq nysandardy qajetti qural-jabdyqtarmen, dári-dármektermen qamtý jóninde birqatar tapsyrma berdi. Tıisti organdar basshylyǵy táýlik boıy kezekshilik atqaratyn qyzmetkerlerdiń tizimin daıyndaýy tıis.
«Biz koronavırýs ınfektsııasynyń aldyn alý úshin sanıtarlyq nysandardyń jumysyn uıymdastyrýymyz qajet. Karantın jarııalanǵan aımaqtardan qalaǵa kiretin kólik jolaýshylaryn muqııat qadaǵalaý kerek» - dedi Atyraý oblysynyń ákimi Mahambet Dosmuhambetov.
Kóshpeli keńes barysynda óńir basshysy Mahambet Dosmuhambetov oblystyq týberkýlezge qarsy dıspanserde boldy. Munda jeke gıgıenalyq zattary men qaýipsizdik tehnıkasy, karantınge jatqyzylǵan naýqastarǵa arnalǵan jıhazdar jetkizilgen qoıma tekserildi. Qajetti jabdyqtar «Teńizshevroıl» kompanııasynyń demeýshilik qarajaty esebinen alynǵan. Qazir oblysta 1800 statsıonarlyq oryn daıyndalǵan.
