Atyraýda 4 myń kóshet otyrǵyzyldy

ATYRAÝ. QazAqparat –Atyraý oblysynyń ákimi Nurlan Noǵaev oblys ortalyǵyn kógaldandyrý jumystaryna qatysty, dep habarlaıdy Óńirlik kommýnıkatsııalar qyzmeti.

Bul kúni qalaǵa jalpy sany 4000-ǵa jýyq qaraaǵash, shegirshin, úıeńki, shaǵan aǵashtarynyń kósheti otyrǵyzyldy.

«Mundaı aktsııany alǵash ótkizip turǵan joqpyz. Bul aımaqtaǵy qorshaǵan ortany jaqsartýǵa baǵyttalǵan mindetterdiń biri. Jergilikti jaǵdaıǵa beıimdelgen aǵashtar»,-dedi oblys ákimi.

Astanamyz Nur-Sultan qalasynyń mańyna Elbasy tapsyrmasymen jasyl beldeý qurylǵanyn bilemiz. Elimizdegi barlyq qalalarda kógaldandyrý jumystaryn júrgizý týraly tapsyrma bar. Bul másele Prezıdent Qasym-Jomart Toqaevtyń da nazarynda.

Oblys ákimi atap ótkendeı, mundaı sharalar adamdardy tabıǵatqa qamqorlyqpen qaraýǵa shaqyrady. Bastysy, aktsııa turǵyndardan tolyq qoldaý tapty.

«Túrli pikirlerge qaramastan Atyraýdy jasyl qalaǵa aınaldyrýǵa bolady. Biraq bul turǵyndardyń aralasýymen júzege asady. bizdiń klımattyq jaǵdaıymyz qataldaý, sonda da qazirgi zamanǵy tehnologııalardy qoldana otyryp, ekologııany jaqsartatynymyzǵa senemiz. Sońǵy jyldary otyrǵyzylǵan kóshetter jaqsy ósip jatyr, bul da oblys ortalyǵynyń ekologııasyn jaqsartýǵa yqpal etedi»,-dedi Nurlan Noǵaev.

Aıta keteıik, kúzgi mezgilde Atyraýǵa bul aktsııadan bólek taǵy da 3 myń kóshet otyrǵyzylady. Bıyl kóktemde 2500-den astam kóshet otyrǵyzyldy.

Eske salsaq, bıyl Atyraý qalasyn kógaldandyrý boıynsha jobany «Kaspııdormostostroı» JShS júzege asyrady. MJÁ aıasynda kompanııa oblys ortalyǵyn kógaldandyrý, jasyl jelekterdi kútý, sý qubyryn jóndeý, jalpy uzyndyǵy 147 km jańa sý qubyry jelisin salý jumystarymen aınalysady. Mekememen kelisim shart bes jylǵa jasalǵan.

Kompanııa osy ýaqyt aralyǵynda 50000 aǵash otyrǵyzyp, jyl saıyn 338 myń gúl, 3,5 myń dana tal egedi. 2023 jyly otyrǵyzylǵan aǵashtar sany 25 myńǵa jetedi, onyń eki myńy jemis aǵashtary bolady degen jospar bar.