Atyraýda 4 kúnnen beri iz-túzsiz ketken 15 jasar bozbala aman-esen tabyldy
ATYRAÝ. QazAqparat – Atyraý oblysynda polıtseıler 4 kún buryn úıinen ketip qalǵan 15 jasar jasóspirimdi taýyp, anasyna tapsyrdy, dep habarlaıdy QazAqparat.
Oblystyq polıtsııa departamenti baspasóz qyzmetiniń habarlaýynsha, Qyzylqoǵa aýdany Mııaly aýylynyń turǵyny 15 jasar ulynyń úıinen shyǵyp ketip, oralmaǵanyna 4 kún bolǵanyn aıtyp aryzdanǵan.
Joǵalǵan jasóspirimdi izdeýge aýdandyq polıtsııa bóliminiń, okrýgterdegi polıtsııa bólimsheleriniń barlyq jeke quramy jumyldyrylǵan. Kámeletke tolmaǵan balany jan-jaqty izdestirý úshin top-top bolyp bólingen saqshylar aýdandaǵy aýyl-selolardy, dalalyq joldardy túgel qamtyǵan.
«Polıtsııa bóliminiń ýchaskelik polıtsııa ınspektory, polıtsııa kapıtany A.Sarsenǵalıev, kámeletke tolmaǵandar isi jónindegi ınspektor, polıtsııa maıory B.Baıjan, patrýldik polıtsııa aǵa ınspektory, polıtsııa kapıtany J.Amanjolov, anyqtaýshy, polıtsııa leıtenanty O.Elaman, jedel ýákil, polıtsııa kapıtany Sh.Naýryzǵalıev balany Mııalydan 4-5 km jerdegi dalada, aýylǵa aparatyn jol boıynan taýyp, anasyna tapsyrdy» dep habarlady polıtsııa departamentiniń baspasóz qyzmeti.
Joǵalǵan jasóspirimniń anasy –1976 jylǵy azamatshanyń aıtýynsha, ulynyń úıde joǵyna alǵashqyda qatty mán bermegen. Ulyn atasynyń úıine ketken bolar dep oılaǵan. Óıtkeni, jasóspirim buryn da otbasyndaǵylarǵa aıtpastan, aýdan ortalyǵynan 100 shaqyrym jerde ornalasqan Qarabaý eldi mekenindegi atasynyń úıine jıi ketip júrgen.
«Bul joly da solaı bolar dep oıladym. Biraq, Qarabaýdaǵylarǵa telefon shalǵanda, onyń kelmegenin bildim. Barýy múmkin-aý degen boljammen, barlyq týǵan-týystardan surastyryp, tórt kún boıy izdedim. Amalym taýsylǵan soń polıtsııanyń kómegine júgindim» deıdi 4 kúnnen keıin tabylǵan jasóspirimniń anasy.
ıÝvenaldy polıtsııa tobynyń ınspektorlary men arnaıy psıholog-mamandar balamen sóılesip, dárigerler onyń densaýlyǵyn, dene jaraqatynyń bar-joǵyn teksergen. Al, polıtseıler jasóspirimniń ata-anasymen túsindirý jumysyn júrgizdi.
Balanyń óziniń aıtýynsha, úıinen shyǵarda jyly kıimin, arqaǵa asatyn sómkesine azyq-túlik salyp shyqqan. Kúndiz dalada «serýendep», túnde tanys dostarynyń úıine qonyp júrgen.
Úıinen sebepsiz ketip, týystaryn da, ózge jurtty da ábigerge salǵan jasóspirimniń anasy Qyzylqoǵa aýdandyq polıtsııa bóliminiń qyzmetkerlerine ulyn izdeýge jedel kirisip, taýyp bergeni úshin alǵys aıtty.
