Atyraýda 4 kólik soqtyǵysyp, eki adam kóz jumdy

ATYRAÝ. QazAqparat – Atyraýda 4 kólik soqtyǵysyp, júrgizýshi men jolaýshy kóz jumdy, dep habarlaıdy QazAqparat tilshisi.

Jol-kólik oqıǵasy búgin, 15 shilde kúni saǵat 15:25 shamasynda bolǵan.

«Atyraý qalasyndaǵy M.Baımuhanov kóshesinde 4 avtokólik soqtyǵysty. Tórt avtokóliktiń ekeýi – jolaýshylar tasymaldaıtyn «Daewoo» jáne «Youtong» markaly avtobýs. Al, ekeýi – Toyota Camry jáne Hyundai Elantra markaly kólikter. Jol apatynyń saldarynan Hyundai Elantra avtokóliginiń júrgizýshisi men jolaýshysy oqıǵa ornynda qaıtys boldy. Kámeletke tolmaǵan jasóspirim jolaýshy oblystyq balalar aýrýhanasyna jetkizildi. Ózge kólik quraldarynyń jolaýshylaryna jedel-járdem qyzmetkerleri medıtsınalyq kómek kórsetti» -dep habarlady oblystyq polıtsııa departamentiniń baspasóz qyzmeti.

Qazirgi ýaqytta tıisti tergeý amaldary júrgizilip,is-qujattar jınaqtalyp jatyr.

Eske sala ketelik, budan buryn Atyraýda jol-kólik oqıǵalary saldarynan mert bolǵandar sany 8,8%-ǵa óskenin habarlaǵan bolatynbyz.

Atyraý oblystyq polıtsııa departamentiniń bastyǵy Nurhat Orazbaevtyń aıtýynsha, bıylǵy 5 aıda jol-kólik oqıǵasy 5,4%-ǵa tómendegen. Alaıda mert bolǵandar sany 8,8%-ǵa ósken.

«Jol-kólik oqıǵalarynyń deni júrgizýshilerdiń jyldamdyqty shamadan tys asyrýynan, qarsy baǵytqa shyǵýynan bolady. Respýblıkalyq mańyzy bar tasjoldarda normatıvke sáıkes táýligine 3 500 avtokólik ótýi tıis. Qazir bul kórsetkish 9 myń avtokólikke jetti. Nátıjesinde avtokólikterdiń aǵyny 3 ese artyp, jol apatynyń ósýine áser etip otyr», - dedi Nurhat Orazbaev.