Atyraýda 373 áıel jańa kásipti úırenýge ótinish bildirdi
Atyraý oblysynyń ákimi Nurlan Noǵaevtyń bastamasymen qurylǵan «Isker Ana» áleýmettik-bilim berý jobasy qysqa merzim ishinde kópbalaly otbasylar, jalǵyzbasty analar, sondaı-aq, az qamtylǵan otbasyndaǵy áıelder arasynda belsendi suranysqa ıe boldy. Jobanyń bastalǵan sátinen bastap 373 áıel qatysýǵa ótinim berdi, qazirgi tańda olardyń 100-i segiz baǵyt boıynsha oqyp jatyr, 24-i oqýyn aıaqtap, sertıfıkat aldy.
«Atyraý oblysy ákiminiń birinshi orynbasary Serik Shapkenov áıelderge arnaıy kýrsty aıaqtaǵany týraly sertıfıkat tabystady. Naýryzdyń basynan beri áıelder «Manıkıýr» jáne «Vızajıst» baǵyttary boıynsha oqýyn aıaqtap, jaqyn arada alynǵan mamandyqtary boıynsha jumysqa kirisedi», - dedi Azamattyq ortalyqtyń dırektory Áıgerim Dosqalıeva.
«Isker Ana» jobasy 12 baǵyt boıynsha oqytýdady. Sondaı-aq, kýrs barysynda toptyq psıhologııalyq trenıngter ótkiziledi, qatysýshylar áleýmettik jelilerde jumys isteý, maqsatty jarnama ornatý, onlaın-saýdany júrgizý mashyqtaryn ıgeredi, sondaı-aq bıznesti júrgizý negizderin úırenetin bolady.
Atyraý oblysynyń ákimi Nurlan Noǵaev oqytýda jaqsy nátıjege jetken áıelderge kómek kórsetiletinin aıtty.
«Biz qysqa merzimdi kýrsty bitirýshilerdiń bıznes jobalaryn qarastyramyz jáne múmkindiginshe bıznesti damytý úshin qajetti qural-jabdyqtardy satyp alýǵa kómektesemiz - tigin nemese toqyma mashınasyn, massaj ústelin, pesh jáne taǵy basqalaryn áperýge kómek beremiz», - dedi aımaq basshysy.
«Isker Ana» qoǵamdyq-bilim berý jobasyna qatysý úshin Mahambet kóshesi, 88 mekenjaıynda ornalasqan Azamattyq ortalyqqa nemese 87786639263 telefonyna habarlasý kerek.
