Atyraýda 33 otbasyǵa jańa páter berildi

ATYRAÝ. QazAqparat - Atyraýda Konstıtýtsııa kúni qarsańynda 33 otbasy jańa páterge ıe boldy, dep habarlaıdy QazAqparat tilshisi.

Jańa páterler «Nursaıa» yqsham aýdanynda boı kótergen 9 qabatty turǵyn úıdiń birinen berildi. Baspanaly bolǵandardyń deni – 2013 jyldan beri turǵyn úı kezeginde turǵan kópbalaly otbasylar.

«Bul – «Nurly jer» baǵdarlamasy aıasynda jalǵa berilgen páterler. Atalǵan baǵdarlama aıasynda jyl basynan bergi 8 aıda jańa baspana alǵandardyń sany 257 otbasyǵa jetti», - dedi Atyraý qalalyq turǵyn úı-kommýnaldyq sharýashylyq bólimi turǵyn úı sektorynyń meńgerýshisi Rafhat Joldıev.

Onyń aıtýynsha, bıyl qonys toıyn toılaıtyn otbasylar qatary arta túspek. Jyl aıaǵyna deıin turǵyn úı kezeginde turǵandardan bólek apatty jaǵdaıdaǵy jataqhanalardyń turǵyndaryn da kóshirý kózdelip otyr.

Eske sala ketelik, budan buryn Atyraýda apatty úıdiń turǵyndary jańa páterge ıe bolǵan edi.