Atyraýda 30 mln teńgeniń dári-dármegi tegin taratylýda
Óńirlik kommýnıkatsııalar qyzmetiniń habarlaýynsha, oblys ákimi Mahambet Dosmuhambetovtiń tapsyrmasymen quny 30 mıllıon teńgeni quraıtyn dári-dármekter turmysy tómen otbasylarǵa tegin taratyla bastady. Tegin dári-dármekterdi qala men jeti aýdanan 3000 otbasy alady.
«Memleket azamattarymyzdy qoldaýdy bir sát te toqtatpaıdy. Bul aımaq basshysy Mahambet Dosmuhametovtiń bastamasymen jáne «Biz birgemiz» oblystyq qorymen birlesip júzege asyrylyp jatqan shara. Bir-birimizge kómek qolyn sozyp, osyndaı qıyn ýaqytta qoldaý kórsetý - bárimizdiń ortaq mindetimiz, patrıottyq paryzymyz. Biz turmysy tómen 7 sanatyn dári-dármekpen qamtamasyz etýdi josparlap otyrmyz. Bul ıgi bastama aldaǵy ýaqytta da jalǵasyn tabady», - dedi Atyraý oblysy ákiminiń orynbasary Baqytgúl Hamenova.
Otbasylarǵa 30 túrli dári-dármek salynǵan paketti jetkizýge 50-ge jýyq avto-erikti men «Jas Otan» Jastar qanatynyń eriktileri qatysýda. Dári-dármekter salynǵan paketter áleýmettik az qamtylǵan otbasylardyń 7 sanatyna beriledi. Atap aıtqanda, asa muqtaj jandarǵa, kópbalaly jáne tabysy az otbasylarǵa, birinshi toptaǵy múmkindigi shekteýli jandarǵa, erekshe balalary bar otbasylar, tómen zeınetaqy alatyn jáne áleýmettik az qamtylǵan topqa kiretin zeınetkerler, jetim balalar, tyl eńbekkerleri men Ekinshi dúnıejúzilik soǵysqa qatysqandar men olarǵa teńestirilgender qamtylady.
«Volonterlar dári-dármekterdi jınap, olardy jetkizýdi bir kún buryn bastady. Ár jıyntyqta maska, dene qyzýyn túsiretin dáriler, sondaı-aq jóteldi basatyn dári-dármek te bar. Bizdiń volonterlarymyz amanattardy aman-esen ıelerine jetkizip beredi. Olar ara qashyqtyqty saqtaıdy»- dedi eriktiler shtabynyń jetekshisi Áıgerim Járdemqyzy.
Eske sala ketelik, buǵan deıin Atyraýda 3000 otbasy 30 mln teńgeniń dári-dármegin tegin alatyn jazyp edik.