Atyraýda 30-dan astam úıdi tonaǵan qylmystyq top sottaldy
ATYRAÝ. QazAqparat - Atyraý oblysynyń kámeletke tolmaǵandar isteri jónindegi mamandandyrylǵan aýdanaralyq sotta iri kólemde urlyq jasady degen aıyp taǵylǵan tórt jigit pen bir jasóspirimge qatysty qylmystyq is qaraldy.
«Sot protsesi barysynda anyqtalǵandaı, aıyptalýshylar 2015 jyldyń naýryzy men 2016 jyldyń sáýiri aralyǵynda úı ıeleriniń joqtyǵyn paıdalanyp, Atyraý qalasyndaǵy 33 úıden aqsha, altyn buıymdar men ózge de baǵaly zattardy urlaǵan. Jábirlenýshilerge jalpy somasy 10 mln. teńgege materıaldyq shyǵyn keltirildi», - delingen oblystyq kámeletke tolmaǵandar isteri jónindegi mamandandyrylǵan aýdanaralyq sottyń baspasóz qyzmeti taratqan aqparatta.
Sot úkimimen kámeletke tolmaǵan aıyptalýshy M.E.-ge 1 jylǵa probatsııalyq baqylaý túrindegi jaza taǵaıyndaldy. Qylmystyq istiń ózge fıgýranttary 3-ten 8-jylǵa deıin jalpy rejimdegi túzetý kolonııasyna toǵytyldy. Sondaı-aq, sot sheshimimen olardan keltirilgen materıaldyq shyǵyn óndirilip alynatyn bolady.
