Atyraýda 3 myńnan astam áleýmettik nysan qujattandyryldy
ATYRAÝ. QazAqparat –Atyraý oblysynda múmkindigi shekteýli adamdar úshin qoljetimdi orta qurý maqsatynda 3141 nysan qujattandyryldy, dep habarlaıdy QazAqparat.
Oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Álfııa Tóleǵarıevanyń málim etýinshe, Atyraýda 23 000-nan astam múmkindigi shekteýli adam tirkelgen. Onyń ishinde birinshi topta – 1 895, ekinshi toptaǵy 9 629 adam bar. Al, úshinshi toptaǵy múgedekter 8049 adamdy qurady.
Sondaı-aq, múmkindigi shekteýli balalar sany – 3 688. Estý jáne kórý qabileti tómen, arbaǵa tańylǵan múmkindigi shekteýli jandarǵa kedergisiz orta qalyptastyrý úshin birqatar nysandarǵa beıimdeý jumystary júrgizilgen.
«Qazirgi ýaqytta oblystaǵy áleýmettik ınfraqurylymdyq nysandardyń barlyǵy qujattandyryldy. Onyń ishinde 1389 nysanǵa beıimdeý jumystary júrgizildi», - dedi Álfııa Tóleǵarıeva.
Onyń aıtýynsha, Atyraý oblysynda jyl basynan beri múmkindigi shekteýli jandar 1303 ońaltý tehnıkalyq quraldarymen qamtamasyz etilgen.
