Atyraýda 3 adamnyń ólimine sebepker bolǵan avtobýs júrgizýshisi sottaldy
ATYRAÝ. QazAqparat – Atyraý oblysynda úsh adamnyń ólimine ákelip soqtyrǵan jol apatynyń sebepkeri, 54 jastaǵy avtobýs júrgizýshisi sottaldy, dep habarlaıdy QazAqparat.
Rezonans týǵyzǵan atyshýly jol apaty aqpan aıynda «Atyraý – Oral» tasjolynda bolǵan. 54 jastaǵy júrgizýshi tizgindegen marshrýtty avtobýs júk kóligimen soqtyǵysqan. Oqıǵa ornynda úsh adam mert boldy, 20-ǵa jýyq adam jaraqat aldy. Onyń ishinde jarysqa bara jatqan kishkentaı balalar da bar bolatyn
«Sot otyrysy kezinde júrgizýshiniń kinási tolyǵymen dáleldendi. Sottalýshy usynylǵan aıǵaq-dáleldermen kelise otyryp, óz kinásin moıyndady. Ol jábirlenýshi taraptan keshirim surap, bas bostandyǵynan aıyrmaýdy ótindi. Sottalýshynyń shyn nıetpen ókinýi, turǵylyqty jerinen berilgen jaǵymdy minezdeme, áıeliniń aýyr naýqasqa shaldyǵýy men buryn sottalmaǵany – osynyń bárin sot qylmystyq jaýapkershilikti jumsartatyn jaǵdaı retinde eskerdi», - dep atap ótti oblystyq sottyń baspasóz qyzmetinen.
Sot úkimimen aıypkerdiń bas bostandyǵy 6 jylǵa shekteldi. Sonymen qatar, ol kólik júrgizý quqyǵynan bes jylǵa aıyryldy.
