Atyraýda 3 adam polıtsııanyń joǵalǵan qarýlaryn ákelip berdi – Qamza Úmbetqalıev
– Qamza Baqtyǵalıuly, Atyraý oblysynda Tótenshe jaǵdaı kezinde qansha blokpost qoıyldy? Odan qansha kólik ótti?
– Prezıdent Jarlyǵymen Atyraý oblysynda tótenshe jaǵdaı rejımi 5 qańtarda jarııalanǵan edi. Tótenshe jaǵdaı rejımi 19 qańtarǵa deıin kúshinde boldy. Osy kezeńde óńir aýmaǵynda túngi saǵat 23:00-den tańǵy 7:00-ge deıin komendanttyq saǵatqa baılanysty turǵyndar men kólik qozǵalysyna shekteý engizildi. Tótenshe jaǵdaı jarııalanǵan kúni Atyraý qalasyna 4 baǵyttan kiretin jolǵa 4 blokpost, Jylyoı aýdanyndaǵy Teńiz ken ornynda 1 blokpost qoıyldy. Atalǵan blokpostardan ótken 40 myńnan astam avtokóliktiń júrgizýshileri men jolashýshylary, júk salǵyshy men salony jiti tekserildi. Sondaı-aq, Atyraý qalasynda Jaıyq ózeniniń ústinen salynǵan 6 kópirdiń eki jaǵalaýynda 12 post ornatyldy.
– Komendanttyq saǵat rejımin buzǵandarǵa qandaı jaza qoldanyldy?
– Tótenshe jaǵdaı kezinde oblystyq Polıtsııa departamentiniń jeke quramy kúsheıtilgen rejımde jumys isteýge kóshti. Al 5-19 qańtar aralyǵynda komendanttyq saǵat rejımin buzǵan adamdarǵa qatysty QR Ákimshilik quqyqbuzýshylyq týraly kodeksiniń 476-babymen (Tótenshe jaǵdaı rejımin buzý) 254 ákimshilik hattama toltyryldy. Soǵan sáıkes, 46 adam ákimshilik qamaýǵa alyndy. Al 19 tulǵaǵa aıyppul salynyp, 117 adamǵa eskertý berildi. Sondaı-aq, tótenshe jaǵdaı rejıminiń talaptaryn oryndamaýǵa baılanysty 2 derek anyqtaldy. Buǵan qatysty QR Ákimshilik quqyqbuzýshylyq týraly kodeksiniń 478-babymen (Tótenshe jaǵdaı kezinde quqyqtyq tártipti buzýǵa ıtermeleıtin áreketter) hattama toltyryldy.
– Tótenshe jaǵdaı kezinde qandaı qarýlar tárkilendi?
– Tótenshe jaǵdaı kezinde júrgizilgen jedel is-sharalar nátıjesinde blokpostan ótpek bolǵan kólikten 10-nan astam ańshy pyshaǵy, Atyraý qalasynyń aýmaǵynda 5 adamnan 896 tabletka túrindegi, 236 ampýla túrindegi, 150 tútikke salynǵan ýyttylyq áseri joǵary psıhotroptyq dáriler men 2 tapansha tárkilendi. Jappaı tártipsizdikke qatysqan buzaqynyń biri – buryn áseri joǵary psıhotropty dárilerdi zańsyz satyp alǵany úshin jaýapqa tartylǵan 1997 jyly týǵan jigittiń úıin tintý kezinde áskerılerdiń oq ótkizbeıtin úsh brondy jıleti tabyldy. Al jappaı tártipsizdikke qatysqany úshin ustalǵan 1991 jyly týǵan kúdiktiniń úıinen atys qarýy tabyldy.
Sondaı-aq, 3 azamat óz erkimen qaqtyǵys kezinde polıtsııanyń joǵalǵan 3 qarýyn (3-ford-500 m) tapsyrdy. Sotqa deıingi tergep-tekserý kezinde 1 adamnan polıtsııa qyzmetkerinen tartyp alynǵan 1 Kalashnıkov avtomaty tárkilendi. Al 3 adam 20 oq-dárini óz ekrimen ákelip berdi.
– Alkogoldik ishimdik satqan dúkender men saýda oryndary anyqtaldy ma?
– Tótenshe jaǵdaı rejıminiń tabalptaryna sáıkes alkogol ónimderin satýǵa tyıym salyndy. Alaıda, bul shekteýge qaramastan óńirde alkogoldik ónimderdi saýdalaǵan 5 derek tirkeldi. Máselen, 9 qańtarda Atyraý qalasyndaǵy «Vokzal mańy» shaǵyn aýdanynda ornalasqan alkomarketterdiń birinde 1980 jylǵy azamatshanyń alkogoldik ónimderdi satqany anyqtaldy. Osyǵan baılanysty alkomarkettiń ıesine qatysty QR Ákimshilik quqyqbuzýshylyq týraly kodesiniń 476-babymen (Tótenshe jaǵdaı rejımin buzý) ákimshilik hattama jasaqtaldy. Oǵan sot sheshimimen 10 aılyq eseptik kórsetkish kóleminde aıyppul salyndy. Alkogol ónimderin satý týraly zań talaptaryn buzǵan kásipkerlerdiń bári ákimshilik jaýapkershilikke tartyldy.
Eske sala ketelik, buǵan deıin Atyraýda tótenshe jaǵdaı kezinde 46 adam ákimshilik qamaýǵa alynǵanyn habarlaǵan bolatynbyz.
