Atyraýda «2GIS» qalalyq aqparattyq ortalyq iske qosylady
ATYRAÝ. QazAqparat - Qazir oblys ortalyǵyndaǵy barlyq áleýmettik, mádenı, turǵyn úı jáne bıznes nysandar enetin qalanyń aqparattyq kartasy daıyndalyp jatyr, dep habarlaıdy QazAqparat Atyraý qalalyq ákimdiginiń baspasóz qyzmetine silteme jasap.
«2GIS» aqparattyq ortalyǵy Qazaqstannyń 11 qalasynda bar. Atyraý tegin mobıldi qosymsha engizilgen oblys ortalyqtarynyń arasynda 12-inshi bolyp otyr.
«Qazir óndiris bólimine qyzmetkerler jınap jatyrmyz, qalany salystyra tekserýdi, mekemeler týraly aqparat jınap, biryńǵaı kartaǵa engizýdi úıretýdemiz.
Daıyndyq jumystary naýryzǵa deıin jalǵasady. Naýryzdan bastap mobıldi qosymsha iske qosylady, ony atyraýlyq turǵyndar qoldana alady», deıdi Atyraýdaǵy «2GIS» JShS basshysy Saǵat Nurmaǵanbetov.
Qalalyq aqparattyq ortalyq ókilderiniń aıtýlarynsha, jańa qosymsha atyraýlyq turǵyndarǵa ǵana emes, qala qonaqtaryna da kómekshi qural bolady.
«2GIS» - qalanyń elektrondy anyqtamalyǵy. Oǵan barlyq ǵımarattar men olarda ornalasqan mekemeler enedi. Navıgator men jolsilteýshi retinde jumys isteıdi. Ol úshin qosymshany telefonǵa nemese basqa mobıldi qurylǵyǵa júktep, aıyna 1 ret jańartyp turý kerek. Mekemeler týraly málimetter tegin engiziledi», - deıdi Saǵat Nurmaǵanbetov.
Aıta keteıik, «2GIS» - halyqaralyq kartografııalyq kompanııa, osy ataýmen 1999 jyldan beri qalalardyń kartalary bar elektrondy anyqtamalyqtar shyǵarady. «2GIS» bas keńsesi RF Novosıbırsk qalasynda ornalasqan. Kompanııa Reseıdiń kóptegen qalalarynyń jáne Qazaqstan, Italııa, Chehııa, Chılı, BAE, Qyrǵyzstan, Ýkraına, Kıprdiń anyqtamalaryn jasaǵan.
Kompanııanyń 2018 jyldyń shildesindegi málimeti boıynsha «2GIS» karta-anyqtamalary 350-den astam qalada jumys isteıdi, aılyq aýdıtorııasy 40 mln tutynýshydan asady. Servıs táýligine 2,2 mln izdeý saýalyn óńdeıdi.
