Atyraýda 26 áıel men 52 bala otbasylyq zorlyq-zombylyqqa ushyraǵan

ATYRAÝ. QazAqparat – Atyraýda jyl basynan beri 26 áıel men 52 bala otbasynda zorlyqqa ushyraǵan. Olar daǵdarys ortalyǵyna ornalastyryldy, dep habarlaıdy QazAqparat.

Oblystyq polıtsııa departamenti baspasóz qyzmetiniń deregine súıensek, 102 nomerine túsetin shaqyrtýdyń deni otbasylyq janjalmen baılanysty bolyp otyr.

«Polıtsııa qyzmetkerleri 102 nomerine túsetin kúndelikti shaqyrtýlarǵa monıtorıng júrgizedi. Máselen, Atyraý qalasynda bir kúnde osyndaı sıpattaǵy 30-ǵa jýyq qońyraý túsedi. Shaǵym aıtýshylardyń 20-ǵa jýyǵy túngi mezgilde, al, 10-nan astam kúndiz qońyraý shalady. Qońyraý shalýshylardyń deni úı ıesin tynyshtandyrýdy suraıdy. Alaıda, polıtsııadan kómek suraǵan áıelderdiń 80 paıyzy otaǵasyǵa keshirim beredi. Sóıtip, ózderi men balalarynyń quqyǵyn qorǵaýdy esten shyǵarady. Osyndaı keshirimshildiktiń kesirinen otbasyndaǵy janjal taǵy qaıtalanady», -dep habarlady departamenttiń baspasóz qyzmeti.

Bıylǵy jyl basynan beri 1 852 adamǵa qorǵaý nusqamasy shyǵarylǵan. Otbasynyń tynyshyn alǵan 125 adam QR Ákimshilik quqyqbuzýshylyq týraly kodekstiń 461-babymen ákimshilik jaýapkershilikke tartylyp, sot sheshimimen ákimshilik qamaqqa alynǵan.

«Otbasylyq zorlyq-zombylyqtyń basty sebebi – ishimdikti shamadan tys paıdalaný men qyzǵanysh. Jyl basynan beri osyndaı janjaldan 26 áıel men 52 bala zorlyqqa ushyraǵan. Olar daǵdarys ortalyǵyna ornalastyryldy», -dep málim etti departamenttiń baspasóz qyzmetinen.

Eske sala ketelik, budan buryn KSRO tólqujatymen júrgen atyraýlyq 58 jasynda jeke kýáligin alǵanyn jazǵan edik.