Atyraýda 23 jasar jigit, kópirden sekirip, sýǵa batyp bara jatqan adamnyń ómirin qutqaryp qaldy
ATYRAÝ. Sáýirdiń 26-sy. QazAqparat /Andreı Sokolov/ - Atyraý qalasynda sýǵa qulaǵan adamdy qutqarý úshin jas jigit ortalyq kópirden Jaıyq ózenine sekirgen. Búgin málim bolǵandaı, ol - 23 jasar qala turǵyny ıÝrıı Abakýmov eken.
Atyraý oblysynyń ІІD-niń baspasóz hatshysy Gúlnazıra Muhtarovanyń málimdegenindeı, ortalyq kópirdegi tótenshe oqıǵa ótken jumada bolǵan. 33 jasar er adam belgisiz sebeptermen kópirden sekirgen soń birden sý astyna ketken. Shamaly sekýndtardan keıin onyń sońynan ótip bara jatqan jigit sýǵa sekirgen. Ol sýǵa ketken adamdy taýyp alyp, birden jaǵaǵa shyǵarǵan. Jaqyn jerde kezekshilik etken polıtsııa qyzmetkerleri oqıǵa ornyna kelgende olarǵa bolǵan jaǵdaıdy túsindirip, ketip qalǵan.
«Adam es-tússiz kúıde jatqan. Oǵan qoldan dem bergennen kómek bolmaǵan soń, tártip saqshylary qalalyq aýrýhanaǵa jetkizgen. Ol táýlik boıy essiz jatqan. Qazir jaǵdaıy qanaǵattanarlyq. Búgin biz ony ajaldan qutqarǵan adamnyń esimin anyqtadyq - ol 23 jasar qala turǵyny ıÝrıı Abakýmov. Ol onyń ornynda kim bolsa da, dál osylaı jasar edi dep, bul isiniń sebebin túsindirdi»,- deıdi G. Muhtarova.
