Atyraýda 227 sheteldik jaýapqa tartyldy

Atyraýlyq polıtseıler jyl bastalǵaly bul baǵytta 350 zańbuzýshylyqty anyqtap, arzan jumys kúshine qyzyqqan jumys berýshilerdi de jaýapqa shaqyrdy, dep habarlaıdy QazAqparat tilshisi.

«Eńbek etýge ruqsat qaǵazy jeke azamattardyń shaǵyn qurylystary úshin ǵana berilgenine qaramastan QR aýmaǵynda zańdy belsheden basqan 56 Ózbekstan azamaty qaladaǵy seriktestikterdiń biri turǵyzyp jatqan alyp ǵımaratty salýǵa jumysqa turǵan. Jedel shara kezinde anyqtalǵan bul quqyqbuzýshylyq úshin kóshi-qon qyzmeti basqarmasynyń qyzmetkerleri atalǵan tulǵalarǵa qatysty QR ÁQBtK-niń 517 baby, 5 bólimi boıynsha hattama toltyryp, ákimshilik ister protsesýaldyq sheshim qabyldaý úshin sotqa joldady. Sheteldik azamattardy zańsyz eńbekke tartqany úshin JShS basshylyǵy da jazadan jaltarmaıdy, olarǵa qatysty QR ÁQBtK-niń 519 babyna sáıkes hattama toltyrylady»,- dep habarlaıdy oblystyq Polıtsııa departamentiniń ókilderi.

Aıta ketelik, jedel shara kezinde el aýmaǵynda sheteldikterdiń kelý, bolý tártibi erejelerin buzý boıynsha 243 fakti anyqtalyp, 227 sheteldik azamat jaýapqa tartyldy. Onyń ishinde zańsyz jumys jasaǵany úshin 140 tulǵaǵa hattama toltyrylsa, sheteldik eńbek kúshin zańsyz paıdalaǵany úshin QR ÁQBtK-tiń 518, 519 baptaryna sáıkes 16 Qazaqstan azamaty jaýapqa tartyldy.