Atyraýda 224 jasandy tynys alý apparaty men 977 ottegi kontsentratory bar
ATYRAÝ. QazAqparat –Atyraý oblysynda 224 jasandy tynys alý apparaty men 977 ottegi kontsentratory bar, dep habarlaıdy QazAqparat.
Oblystyq densaýlyq saqtaý basqarmasy baspasóz qyzmetiniń aqparatyna qaraǵanda, medıtsınalyq kómekke júgingenderge 7 995 dáriger qyzmet kórsetedi. Onyń ishinde 7 091 medıtsına qyzmetkeri memlekettik emdeý uıymdarynda jumys isteıdi.
«Atyraý oblysyndaǵy medıtsınalyq mekemelerde 7 995 medıtsına qyzmetkeri eńbek etedi. Olardyń arasynda jekemenshik klınıkalardyń 904 medıtsına qyzmetkeri bar. Budan bólek, oblystyń medıtsınalyq uıymdary halyqqa kómek kórsetý úshin 224 jasandy tynys alý, 27 rentgen, 10 kompıýterlik tomografııa apparatymen qamtyldy. Sondaı-aq, óńirde 977 ottegi kontsentratory men 1000 pýlsokısmetrmen qamtamasyz etildi», - deıdi oblystyq densaýlyq saqtaý basqarmasy basshysynyń ýaqytsha mindetin atqarýshy Ashan Baıdýálıev.
Onyń aıtýynsha, Atyraý oblysynda 400 oryndyq 2 modýldik aýrýhananyń qurylysy júrýde. Atyraý qalasyndaǵy 200 orynǵa arnalǵan modýldik aýrýhanany paıdalanýǵa berý qazan aıyna, al Qulsary qalasyndaǵy 200 oryndyq osyndaı aýrýhana qarasha aıyna josparlanyp otyr.
Eske sala ketelik, buǵan deıin Atyraý oblysynda koronavırýs juqtyrǵan 10 adam anyqtalǵan edi.
