Atyraýda 222 mektep túlegi óńirlik grant boıynsha bilim alyp jatyr
ASTANA. QazAqparat - 2017 jyly Atyraý oblysynyń úzdik mektep túlekteri alǵash ret jergilikti bıýdjet esebinen joǵary oqý oryndarynda oqý múmkindigine ıe boldy. Atyraý oblysy ákimdiginiń granty boıynsha bilim alatyn 222 stýdenttiń qatarynda Nursaǵıda Amangeldi de bar, dep habarlaıdy óńirlik ákimdiktiń baspasóz qyzmeti.
H.Dosmuhamedov atyndaǵy Atyraý memlekettik ýnıversıtetiniń birinshi kýrs stýdenti Nursaǵıda Amangeldi qajet qujattardy tapsyryp, berilgen múmkindikke ıe bolǵan 222 stýdenttiń biri. Mahambet aýdanynyń Tańdaı aýylyndaǵy mektepti bitirgen ol qazir ýnıversıtette «Pedagogıka jáne bastaýysh bilim berý ádistemesi» mamandyǵy boıynsha bilim alyp jatyr. Nursaǵıdamen bir topta osy aımaqtyq grant boıynsha taǵy da 13 stýdent oqıdy. Bakalavr dıplomyn alǵan soń stýdentterge kelisim shart negizinde Atyraý oblysynda mamandyǵyna saı jumys usynylady.
«Meniń naqty maqsattarym bar, bolashaǵyma jospar qurdym. Bes jyl memleketke jumys istegennen keıin magıstratýraǵa túsip, bilimimdi jetildiremin. Keleshekte ýnıversıtette jumys istep, maman daıyndaý isine úles qosqym keledi. Bizdiń bilimimizge salynǵan qarajat óteletinine, óńirimizdiń ósip-órkendeýine óz úlesimizdi qosatynymyzǵa senemin», - deıdi stýdent.
Nursaǵıdanyń anasy Nurjamal Yrysqalıeva jergilikti atqarýshy organdar taǵaıyndaǵan grant otbasyna úlken kómek bolǵanyn aıtady.
«Aýyldaǵy qarapaıym otbasylarǵa osyndaı qoldaý kórsetilip otyrǵanyna rızamyn. Balalarymyzǵa jaqsy jaǵdaı jasalǵan, tegin bilim alady, jataqhana berildi, jolaqy tólenedi. Biz óte qýanyshtymyz», - deıdi stýdenttiń anasy.
Aıta keteıik, 2017 jyly Atyraý oblysynda jergilikti bıýdjetten 222 bilim berý granty bólindi. Qazir Atyraý, Batys Qazaqstan, Aqtóbe oblystaryndaǵy joǵary oqý oryndarynda 178 bolashaq pedagog, 35 dáriger, 9 mal dárigeri bilim alyp jatyr. Granttar aımaqtaǵy kadr tapshylyǵy bar salalar boıynsha bólingen.
Oblys boıynsha bilim grantyn alýǵa 252 ótinish tústi, solardyń arasynan konkýrstyq irikteý nátıjesinde úzdikter tańdalyp alyndy. Memleket esebinen bilim alǵan stýdentter alǵa qaraı oblys aýmaǵynda jumysqa ornalastyrylady.
2017 jyly qańtarda aımaq basshysy Nurlan Noǵaev bilim berý granttaryn maman tapshylyǵy baıqalatyn salalar boıynsha bólý týraly jaýapty tulǵalarǵa tapsyrma bergen edi. 2018 jyly oblys halqymen kezdesýde Nurlan Noǵaev memleket basshysynyń joǵary bilim alýdyń sapasyn kóterý men qoljetimdiligin arttyrý týraly áleýmettik bastamasy aıasynda óńirde oqýda úzdik kórsetkishterimen daralanǵan mektep túlekterine bilim granttaryn bólý jumysy jalǵasatynyn atap ótti.
