Atyraýda 22 jastaǵy jigit kóshede psıhotroptyq dárilerdi satqan

ATYRAÝ. QazAqparat – Atyraýda 22 jastaǵy jigit psıhotroptyq dárilerdi satyp kelgen, dep habarlaıdy QazAqparat.

Oblystyq Polıtsııa departamenti baspasóz qyzmetiniń aqparatyna qaraǵanda, psıhotroptyq preparattardy satýmen aınalysqan azamat «Dármek» jedel-aldyn alý is-sharasy kezinde anyqtalǵan.

«Ol Atyraý qalasyndaǵy Azattyq kóshesinde psıhotroptyq dárilerdi zańsyz satyp júrgen. Tekserý kezinde 1999 jyly týǵan jigitten 58 dana Tramadol, 31 dana Trapıkamed dári-dármekteri alyndy. Qazir QR Ákimshilik quqyqbuzýshylyq týraly kodeksiniń 426-babymen (Farmatsevtıkalyq qyzmettiń jáne dárilik zattardyń, medıtsınalyq maqsattaǵy buıymdar men medıtsınalyq tehnıkalyq aınalysy salasynyń qaǵıdalaryn buzý) Medıtsınalyq jáne farmatsevtıkalyq baqylaý komıteti Atyraý oblysy boıynsha departamentine sheshim qabyldaý úshin is-qujattar joldandy», - deıdi oblystyq Polıtsııa departamentiniń bastyǵy Qamza Úmbetqalıev.

Onyń aıtýynsha, «Dármek» jedel aldyn alý is-sharasy kezinde 5 ákimshilik quqyq buzýshylyq anyqtalǵan. Sondaı-aq, 2 medıtsına qyzmetkerinen Tramadol dárisiniń 69, Tropıkamed dárilik preparatynyń 1280 tabletkasy alynǵan.

Eske sala ketelik, budan buryn Atyraýda 36 jastaǵy áıel tramadol dárisiniń 60 danasyn zańsyz satqanyn habarlaǵan edik.