Atyraýda 21 mln teńge para alǵan antıkor qyzmetkeri 7 jylǵa sottaldy
Atyraý oblysynyń qylmystyq ister jónindegi mamandandyrylǵan aýdanaralyq sotynda Sybaılas jemqorlyqqa qarsy is-qımyl agenttigi Atyraý oblysy boıynsha departamentiniń qyzmetkerine qatysty qylmystyq is qaraldy. Sottalýshy M-ǵa Qylmystyq kodekstiń 24-babynyń 3-bóligi, 28-babynyń 4-bóligi, 367-babynyń 4-bóligi, 190-babynyń 4-bóligi 2-tarmaǵy boıynsha aıyp taǵylǵan.
«Sotta myna jaıttar anyqtaldy: 2021 jyldyń sáýir aıynda sottalýshy M-ǵa «P.P» JShS basqarma tóraǵasy B-ǵa qatysty departament qyzmetkerleriniń jedel-izdestirý is-sharalary júrgizilgeni belgili bolǵan. M. 26 maýsymda jábirlenýshi B-men kezdesip, oǵan qatysty tekserýdi toqtatýǵa yqpal ete alatynyn aıtqan. Departament pen agenttiktiń basshylyǵy arqyly onyń paıdasyna oń sheshim shyǵaratynyn, bul úshin 30 mln teńge talap etken. M sol jylǵy 30 maýsymda sottalýshy jábirlenýshimen qaıta kezdesý kezinde 21 mln teńgege kelisken. Bul aqshany sottalýshy M tanysynan B-nyń páterinen alyp ketýin suraǵan. Sol kúni M-nyń tanysy jábirlenýshiniń páterinen aqshany alǵan», - dep habarlady qylmystyq ister jónindegi mamandandyrylǵan aýdanaralyq sottyń baspasóz qyzmeti.
Sybaılas jemqorlyqqa qarsy is-qımyl agenttiginiń qyzmetkerleri aqsha berý kezinde kýágerdi ustaǵan. Kórsetilgen mán-jaılar jáne sottalýshynyń kinási jábirlenýshiniń, kýágerlerdiń aıǵaqtarymen, oqıǵa bolǵan jerdi tekserý hattamalarymen, Whatsapp messendjerindegi hat almasýmen, aýdıo, beıne jazbalarmen, saraptama qorytyndylarymen rastalǵan.
Prokýror M-ǵa 10 jylǵa bas bostandyǵynan aıyrý jazasyn taǵaıyndaýdy suraǵan.
«Sot sottalýshy M-ny Qylmystyq kodekstiń 24-babynyń 3-bóligi, 190-babynyń 4-bóligi, 2-tarmaǵy, 28-babynyń 4-bóligimen, 367-babynyń 3-bóliginiń 2-tarmaǵymen kináli dep tanydy. Sottalýshy M-nyń qabyldaǵan antty buzý arqyly qylmys jasaǵanyn jazany aýyrlatatyn jaǵdaı retinde qarastyrdy. Sottalýshynyń jasy men otbasylyq jaǵdaıy eskerildi», - dep málim etti sottyń baspasóz qyzmeti.
Sot úkimimen sottalýshy M-ǵa memlekettik qyzmette qyzmet atqarý quqyǵynan ómir boıyna, 7 jylǵa bas bostandyǵynan aıyrý jazasy taǵaıyndaldy. Sondaı-aq, sottalýshy 5 sanatty biliktilik synybynan aıyryldy.
Sot úkimi zańdy kúshine engen joq.
Eske sala ketelik, budan buryn Atyraý oblysy ákiminiń burynǵy birinshi orynbasary 10 jylǵa sottalǵan bolatyn.
