Atyraýda 2025 jylǵa deıin 30-ǵa jýyq medıtsınalyq nysan salynady
Ákimniń atap ótýinshe, Atyraý oblysynyń keshendi jospary jáne «Aýyldyq densaýlyq saqtaýdy jańǵyrtý» ulttyq joba aıasynda 2025 jylǵa deıin óńir boıynsha 30-ǵa jýyq zamanaýı jańa tıptik jobadaǵy medıtsınalyq nysandar salynady.
«Qazirgi tańda 5 medıtsınalyq pýnktiń qurylysy júrgizilýde (Jylyoı aýdanynyń Qaraǵaı, Qyzylqoǵa aýdanynyń Aıdyn, Mahambet aýdanynyń Aqqaıyń, Eńbekshil, Kózdiqara aýyldary). Úsh qosalqy stantsııasy bar jedel járdem stantsııasynyń qurylysyn bastaý josparlanǵan. Osy jyly aýyldyq jerlerde taǵy 5 nysannyń qurylysy bastalady», - dedi oblys basshysy búgin Ortalyq kommýnkatsııalar qyzmetindegi baspasóz máslıhatynda.
Serik Shápkenoviń atap ótýinshe, «Teńizshevroıl» JShS qarajaty esebinen Qulsary qalasynda 75 oryndyq ortalyq aýdandyq aýrýhananyń, NKOK kompanııasynyń kómegimen Atyraý qalasynyń Bereke yqshamaýdanynda 50 kelýshige arnalǵan dárigerlik ambýlatorııa qurylystary júrgizilip jatyr. Atyraý qalasynda da eki emhana salý josparlanǵan. Al Atyraý qalasyndaǵy oblystyq onkologııalyq dıspanserdiń eski ǵımaratynyń ornyna 180 tósektik onkologııalyq dıspanserdiń radıologııalyq korpýsynyń qujaty daıyn. Qazir onkologııalyq dıspanserdiń jobalaý-smetalyq qujattamasy jasaqtalýda.
