Atyraýda 2018 jyldan beri halyqaralyq izdeýde júrgen sheteldik ustaldy
Oblystyq polıtsııa departamentiniń baspasóz qyzmetinen málim etkendeı, Ózbekstan Respýblıkasynyń 42 jastaǵy azamatyna Reseıde halyqaralyq izdeý salynǵan.
«Búgin, 19 maýsymda Atyraý oblysy aýmaǵynda «Zańsyz kelýshi-2023» jedel profılaktıkalyq is-sharasy bastaldy. Іs-sharanyń maqsaty – zańsyz kóshi-qon faktilerin, el aýmaǵynan shyǵaryp jiberý týraly sot sheshimin oryndamaǵan sheteldikterdi anyqtaý. Atyraý qalalyq polıtsııa basqarmasy kóshi-qon qyzmeti bóliminiń qyzmetkerleri 2018 jyldan beri halyqaralyq izdeýde júrgen Ózbekstan Respýblıkasynyń 1981 jylǵy azamatyn ustady. Sheteldik 2023 jyldyń 3 maýsymynda Qazaqstan shekarasynan ótken. Atyraý qalalyq kóshi-qon qyzmeti bólimine jumysqa ornalasý úshin qujat tapsyrýǵa kelgen. Polıtsııa qyzmetkerleri shetel azamatynyń jeke basyn jan-jaqty tekserý kezinde halyqaralyq izdeýdegi kúdikti ekenin anyqtady», -dep habarlady departamenttiń baspasóz qyzmeti.
Belgili bolǵandaı, Ózbekstan Respýblıkasynyń azamatyna 2018 jyly Reseı Federatsııasy Qylmystyq Kodeksiniń 322-babynyń 1-bóligimen halyqaralyq izdeý jarııalanǵan. Qazir atalǵan fakti boıynsha qylmysker ustalyp, krımınaldyq polıtsııa basqarmasyna tapsyryldy.
Eske sala ketelik, budan buryn Atyraý polıtsııasy 60 adamǵa izdeý jarııalaǵanyn habarlaǵan edik.
Oblystyq polıtsııa departamenti krımınaldyq polıtsııa basqarmasynyń aqparatyna qaraǵanda, 19 adam iz-túzsiz joǵalyp ketken. Sondaı-aq, qylmys jasaǵan 41 adamǵa izdeý jarııalanyp otyr. Qylmys jasady degen kúdikke ilingenderdiń deni – er adam. Arasynda eki áıel bar.
