Atyraýda 20 jyldan beri halyqaralyq izdeýde júrgen kúdikti ustaldy

ATYRAÝ. QazAqparat - 20 sáýir kúni Atyraý oblysy polıtsııa departamenti ekstremızmge qarsy is-qımyl basqarmasynyń qyzmetkerleri jedel-izdestirý barysynda halyqaralyq izdeýde júrgen 1975 jyly týǵan Ózbekstan azamatyn anyqtap, ustady, dep habarlaıdy QazAqparat.

Tekserý barysynda sheteldik azamatqa Ózbekstan Respýblıkasy Qylmystyq Kodeksiniń 97-babynyń 2-bóligi jáne 248-baby 2-bóligine negizdelgen qylmystyq quqyq buzýshylyq, ıaǵnı qasaqana adam óltirý jáne zańsyz qarý saqtaý boıynsha halyqaralyq izdestirý jarııalaǵany anyqtaldy.

«1975 jyly týǵan shetel azamatynyń ýaqytsha turatyn jerin tintý barysynda Qazaqstan aýmaǵynda tyıym salynǵan dinı kitaptar men dıskiler tárkilendi. Atalǵan fakti boıynsha kúdikti ustalyp, QR QPK-niń 128-babyna sáıkes qamaýǵa alyndy», - delingen ІІM habarlamasynda.