Atyraýda 20 jańa avtobýs paıdalanýǵa berildi
ATYRAÝ. QazAqparat - 21 oryndyq jáne turyp turýǵa arnalǵan 75 orny bar 11 metrlik avtobýstar Atyraýdaǵy qoǵamdyq kólikter qataryn tolyqtyrdy, dep habarlaıdy QazAqparat ákimdiktiń baspasóz qyzmetine silteme jasap.
Osylaısha, Atyraýda qoǵamdyq kólik tujyrymdamasyn iske asyrý bastaldy. Aǵymdaǵy jyldyń aıaǵyna deıin Atyraýǵa taǵy 80 jańa avtobýs keledi.
-Joba ınvestorlardyń qarjysymen júzege asýda, memleket tek kásipkerge lızıng sheńberinde avtobýstar satyp alýǵa bólingen nesıege sýbsıdııa tóleıdi. Jańa qoǵamdyq kólikte elektrondy bılet júıesi ornatylǵan. Jańa avtobýstar № 14 marshrýtqa beriledi, sebebi qaladaǵy eń kóp kúsh salynatyn osy baǵyt bolyp tur, qalǵan baǵyttar keıin jańalanady,-deıdi Atyraý qalasy ákiminiń orynbasary Meıirim Qalaýı.
Aıta keteıik, "Deo -217" markaly jańa avtobýstar 21 oryndyq, 2 oryn múmkindigi shekteýli jandarǵa arnalǵan jáne turyp turýǵa arnalǵan 75 orny bar. Qoǵamdyq kólik uzyndyǵy - 11 metr.
- Búgingi bizdiń basty mindetimiz qoǵamdyq kóliktegi jańa tujyrymdamany júzege asyrý bolyp tabylady, bul másele oblys ákiminiń baqylaýynda. Elektrondyq bıletterdi engizýmen qatar biz bıýdjettegi salyq túsimderin kóbeıtýge, jolaýshylar tasymaly júıesin ózgertýge, qoldanystaǵy qoǵamdyq kólikterdiń jaı-kúıin jaqsartýǵa jáne jańadan satyp alynǵan kólikterdi jaqsy jaǵdaıda ustaýǵa nıettimiz. Budan bólek, qaıta qurý men keńeıtýge kóshken kóshelerde 23 jańa aıaldama ornattyq, kelesi jyly 254 shaqyrymdyq jaıaý júrginshiler jolyn salýdy josparlap otyrmyz,- deıdi qala ákimi Alımuxammed Quttumuratuly.
Eske salsaq, ústimizdegi jyldyń mamyr aıynda Atyraý oblysynyń ákimi Nurlan Noǵaev óńirlik ÚEU-men kezdesý kezinde oblys ortalyǵynda qoǵamdyq kóliktiń jetispeýshiligi jaqynda sheshimin tabatynyn aıtqan bolatyn. Atyraý qalasynda 15 qyrkúıekten bastap pılottyq rejimde jańa elektrondyq bıletter júıesi iske qosyldy, 6 qazanda qalanyń avtoparki 23 jańa avtobýspen toltyryldy. 2018 jyly jyl sońyna deıin jańa 80 avtobýs satyp alynady.
