Atyraýda 20 adamdy aldaǵan alaıaqqa qatysty tergeý júrip jatyr

ATYRAÝ. QazAqparat – Atyraýda 20 adamdy páterdi jalǵa beremin dep aldaǵan alaıaqqa qatysty tergeý júrip jatyr. Kúdikti kelisilgen somanyń jartysyn aldyn ala tóleýdi usynyp, ulynyń esepshotyna aýdartyp otyrǵan, dep habarlaıdy QazAqparat.

Oblystyq polıtsııa departamenti baspasóz qyzmetiniń málimetinshe, aqtóbelik áıel Atyraý qalasynan elıtalyq páterlerdi qolaıly baǵaǵa jalǵa beremin dep 20 adamdy aldaǵan.

«Kúdikti OLX qosymshasy arqyly Atyraý qalasyndaǵy birneshe shaǵynaýdanda páterleri bar ekenine sendirgen. Jalǵa beriletin páter úshin kelisken somanyń 50 paıyzyn aldyn ala tóleýdi ótinip, ulynyń jeke esepshotyna aýdartyp otyrǵan. Qazir krımınaldyq polıtsııa basqarmasynyń qyzmetkerleri kúdikke ilingen 1980 jylǵy áıelge qatysty 20 derek dáleldedi. Alaıaqqa aldanǵandardyń arasynda 9 atyraýlyq bar. Budan bólek Nur-Sultan, Taraz, Almaty, Qaraǵandy, Qostanaı qalasy men Shyǵys Qazaqstan oblysynyń turǵyndaryn da san soqtyrǵan. Osyǵan baılanysty 11 derek anyqtalyp otyr», -dep habarlady departamenttiń baspasóz qyzmeti.

Budan buryn 45 mln teńgege 3 páter alyp beremin dep Almaty turǵynyn aldaǵan atyraýlyq áıel ustalǵan bolatyn.

Polıtsııaǵa Almaty qalasynyń 40 jastaǵy turǵyny shaǵym túsirgen. Jábirlenýshini 44 jastaǵy áıel Atyraý qalasyndaǵy elıtalyq úılerden úsh páter alyp beremin dep sendirgen.

Alaıaq úsh páter úshin jábirlenýshiniń 45 mln teńgesin ıemdenip alǵan. Polıtsııa qyzmetkerleri jedel izdestirý jumystaryn júrgizip, alaıaqtyqpen aınalysqan 44 jastaǵy atyraýlyq áıeldi anyqtady. Kúdikti ustalyp, qamaýǵa alyndy.