Atyraýda 2 qabatty turǵyn úı men kólik janyp ketti
ATYRAÝ. QazAqparat - Atyraýda «Gazel» markaly avtokóligi men eki qabatty turǵyn úı otqa orandy, dep habarlaıdy QazAqparat tilshisi.
«Keshe saǵat 15.38-de Atyraý qalasyndaǵy Kóktem yqshamaýdanynda ornalasqan №10 kósheniń №3 úıdiń aýlasynda «Gazel» markaly avtokóligi órtenip, odan shyqqan jalyn 168 sharshy metrdi quraıtyn qurylysy bite qoımaǵan eki qabatty turǵyn úıdiń shatyryna jaıylǵan. Órt kezinde 1992 jyly týylǵan úıdiń ıesi zardap shekken. Denesin 20-25% kúıik shalǵan, zardap shegýshi oblystyq aýrýhanaǵa jetkizildi», - delingen TJD baspasóz qyzmeti taratqan habarlamada.
Sondaı-aq, oqıǵa ornyna Atyraý oblysy TJD órt sóndirý jáne avarııalyq-qutqarý jumystar qyzmetiniń jeke quramynda 11 adam men 3 tehnıka birligi jumyldyryldy. Órt saǵat 16.56-da tolyqtaı aýyzdyqtaldy.
