Atyraýda 19 jastaǵy júrgizýshi balany qaǵyp ketti

ATYRAÝ. QazAqparat – Atyraýda 13 jasar jasóspirimdi kólik qaǵyp ketti. Ol aýrýhanaǵa jetkizildi, dep habarlaıdy QazAqparat tilshisi.

Atyraý oblystyq polıtsııa departamentiniń baspasóz qyzmetinen málim etkendeı, jol-kólik oqıǵasy 21 tamyzda jergilikti ýaqytpen saǵat 22:40 shamasynda bolǵan.

«Jol-kólik oqıǵasy Atyraý qalasyndaǵy Beıbarys dańǵyly men Toqatov kóshesiniń qıylysynda ornalasqan rettelmegen jaıaý júrginshiler jolaǵynda boldy. Arnaıy jolaqpen ótip bara jatqan 2010 jyly týǵan jasóspirimdi Chevrolet Nexia avtokóligi qaǵyp ketti», -dep habarlady departamenttiń baspasóz qyzmetinen.

Polıtsııa qyzmetkerleri jol-kólik oqıǵasyna kináli 19 jastaǵy júrgizýshige qatysty tıisti is qujattaryn jınaqtap jatyr. Al zardap shekken jasóspirim jedel járdem brıgadasynyń kóligimen oblystyq balalar aýrýhanasyna jetkizildi.

Budan buryn Atyraý oblysynda jyl basynan 7 bala joǵarǵy qabattan qulap, ekeýi mert bolǵanyn habarlaǵan edik. Atyraý oblystyq Tótenshe jaǵdaılar departamentiniń qoǵammen baılanys tobynan málim etkendeı, balalardyń terezeden qulaý jaǵdaılary jıilep ketken.

Bıylǵy jyl basynan beri turǵyn úılerdiń joǵarǵy qabatynan kámeletke tolmaǵan 7 balanyń qulaǵany týraly derek tirkeldi. Onyń ishinde 2 bala mert boldy. Turǵyn úıdiń terezesinen qulaý dereginiń biri 18 tamyzda tirkelip otyr.