Atyraýda 19 qazanǵa deıin 244 kópqabatty úı jylýmen qamtamasyz etiledi
Atyraý qalalyq turǵyn úı-kommýnaldyq sharýashylyǵy, jolaýshylar kóligi jáne avtokólik joldary bólimi mamandarynyń málimetinshe, ortalyqtandyrylǵan jylýǵa qosylýy tıis 1 019 kópqabatty úı bar. Osy kezge deıin kópqabatty turǵyn úılerdiń 80% jylýǵa qosylǵan.
«Jylytý maýsymy bastalǵan kúni 775 kópqabatty turǵyn úı jylýǵa qosylǵan. Qazir áli jylý berilmegen 244 úı bar. Bul úıler 19 qazanǵa deıin jylýmen tolyq qamtylady», - dep habarlady ákimdiktiń atalǵan bóliminiń mamandary.
Atyraý qalasynyń ákimi qalalyq turǵyn úı-kommýnaldyq sharýashylyǵy, jolaýshylar kóligi jáne avtokólik joldary bólimi men PIK basshylaryn 244 úıdi jylýǵa qysqa merzimde qosý jóninde tıisti tapsyrmalar berildi. Turǵyn úılerdi jylýǵa qosýdy keshiktirgen PIK basshylaryna tıisti sharalar qoldanylady.
«Atyraý jylý jelileri» AQ vıtse-prezıdenti Álibek Temirǵalıevtyń deregine súıensek, shaharda jylý berý 10 qazanda bastalǵan.
«Qaladaǵy kópqabatty turǵyn úılerdi jylýǵa qosý úshin PIK-tiń jazbasha ótinishi qajet. Alaıda, birneshe PIK ǵana úılerdi jylý berý qajetti týraly habarlady. Ótken senbi kúni bizdiń qyzmetkerler jylý berý krandaryn ashýǵa daıyn turdy. Biraq, keıbir PIK buǵan daıyn emes ekeni belgili boldy», -dep málim etti Álibek Temirǵalıev.
Eske sala ketelik, budan buryn Atyraýda 200-ge jýyq kópqabatty úıge áli jylý berilmegenin jazǵan edik.