Atyraýda 18 jastaǵy júrgizýshiden myltyqqa uqsas qoldan jasalǵan qarý tárkilendi
ATYRAÝ. QazAqparat – Atyraýda 18 jastaǵy júrgizýshiden myltyqqa uqsas qoldan jasalǵan qarý tárkilendi, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetinshe, júrgizýshiniń kóligi keshe, 15 qańtarda túngi saǵat 1:30 shamasynda toqtatylǵan.
«Qazir Atyraý qalasynda patrýldik polıtsııa men krımınaldyq polıtsııa bóliminiń qyzmetkerleri birlesken jumys júrgizip jatyr. Máselen, 15 qańtarda «Batys–13» ekıpajy jáne krımınaldyq polıtsııa bóliminiń qyzmetkerleri «VAZ – 2109» markaly avtokóligin toqtatqan. Kólikti 2003 jylǵy bozbala basqarǵany anyqtaldy. Tekserý kezinde avtokóliktiń júk salǵyshynan myltyq qarýyna uqsas qoldan jasalǵan zat tabylyp, aıǵaq zat tárkilendi», -dep habarlady departamenttiń baspasóz qyzmeti.
Atalǵan bozbala Atyraý oblysynda jarııalanǵan tótenshe jaǵdaı rejımin buzǵandyǵy úshin QR Ákimshilik quqyqbuzýshylyq týraly kodeksiniń 476-babymen ákimshilik jaýapqa tartyldy. Endi onyń jappaı tártipsizdikke qatysynyń bar-joǵy tekserilip jatyr.
Eske sala ketelik, budan buryn Atyraýda jappaı tártipsizdikke qatysqan kúdiktiden atys qarýy tárkilengenin jazǵan edik.
