Atyraýda 17 jasar bozbalany teplovoz qaǵyp ketti
Atyraý temir jol stantsııasyndaǵy jelilik polıtsııa bóliminiń habarlaýynsha, qaıǵyly oqıǵa keshe, 6 shildede saǵat 17:00 shamasynda bolǵan.
Jergilikti kolledjdiń stýdenti joldy qysqartý úshin «Qara depo» shaǵyn aýdanyndaǵy temirjoldy kesip ótpek bolǵan. Jasóspirimdi «Aqjaıyq-Teńdik» temirjol ótkelinde teplovoz qaǵyp ketti. Mashınıstiń aıtýynsha, temirjol boıynda kele jatqan adamdy baıqaǵan. Alaıda, tejegishti basqanymen, teplovozdy toqtatýǵa úlgermegen.
«Qazir atalǵan derekke baılanysty QR Qylmystyq kodeksi 344-babynyń 2-bóligimen (Abaısyzda adam ólimine ákep soqqan temir jol kóligi qozǵalysy nemese ony paıdalaný qaýipsizdigi qaǵıdalaryn buzý) sotqa deıingi tergeý júrgizilip jatyr. Ózge aqparat QR Qylmystyq-protsestik kodeksiniń 201-babynyń talaptaryna sáıkes tergeý múddesine oraı jarııa etýge jatpaıdy», - dep habarlady kóliktegi polıtsııa departamentiniń baspasóz qyzmeti.
«Qara depo» – Atyraý qalasyndaǵy shaǵyn aýdandardyń biri. Turǵyndar birneshe jyldan beri temirjol ústinen ótkel salý máselesin qozǵap keledi. Jergilikti ákimdik 3 jyl buryn «Qara depo» men «Hımıkter» kenti aralyǵynda jaıaý júrginshiler kópirin salý jobasy qolǵa alynatynyn habarlaǵan edi. Alaıda, joba iske asyrylǵan joq.
Eske sala ketelik, budan buryn Atyraý oblysynda jolaýshylar poıyzy mototsıkl mingen er adamdy qaǵyp ketkeni habarlanǵan bolatyn.
