Atyraýda 165 búldirshinge arnalǵan balabaqsha salyndy
ATYRAÝ. QazAqparat - Atyraý qalasy mańyndaǵy Geolog aýylynda 165 búldirshinge arnalǵan balabaqsha paıdalanýǵa berildi, dep habarlaıdy «QazAqparat» HAA tilshisi.
Aýlasy keń, sáýletti balabaqsha Mıras turǵyn úı alabynda boı kóterdi. Joba quny 303 mıllıon teńgeni qurady, aýmaǵy - 7604 sharshy metr. Munda Geolog aýylyndaǵy barsha bala tárbıelenetin bolady.
Balabaqshanyń saltanatty ashylý rásimine Atyraý qalasynyń ákimi Serik Shápkenov qatysyp, oblys ákiminiń atynan jınalǵandardy Táýelsizdik kúnimen, kópten kútken mektepke deıingi bilim berý mekemesiniń ashylýymen quttyqtady.
Sharaǵa kelgen ata-analar balabaqshaǵa jumsalǵan qomaqty qarjy bosqa ketpegenine kóz jetkizdi. Eki qabatty ǵımarattyń ishindegi kabınetterdiń barlyǵy qazirgi zamanǵy bilim berý talaptaryna tolyq jaýap beretindeı etip jabdyqtalǵan. Munda jeti top tárbıelenedi. Ǵımaratta mýzyka jáne sport zaldary, medıtsına kabıneti, ashana, kir jýý bloktary da bar.
